Laragway: BFAR Western Visayas
SYUDAD SANG ILOILO (PIA) — Ang Barangay Igbon Kasagan Association (BIGKAS), isa ka partner-beneficiary sang Special Area for Agricultural Development (SAAD) Phase 2 nga programa sang Bureau of Fisheries in Aquatic Resources (BFAR), gin-abi-abi ang mga tiglawas halin sa nagkalain-lain nga national government agencies (NGAs) sa ginhiwat nga site visit kag assessment sang Blue Swimming Crab (BSC) Model Village.
Tinutuyo sang sini nga pagbisita nga lantawon ang mga potensyal nga partnership nga magapalig-on sang BSC industry kag mapasangkad ang mga palangabuhian sang mga coastal community.
Makita sa northeastern nga bahin sang Panay Island, ang BIGKAS isa ka komunidad sang pangisdaan nga nagadepende sa crab fishing. Paagi sang ila kolaborasyon sa BFAR-SAAD Western Visayas, ang grupo napili bilang pilot site sang BSC Adopt-a-Village Project. Ang ini nga convergence effort ginpamunuan sang Provincial Program Management Support Office (PPMSO) sa Iloilo kag BSC Technical Working Group sang BFAR para ipalapnag ang sarama kag inklusibo nga pagbag-o sa lugar.
Sa ginhiwat nga aktibidad, ginpakilala sang NGAs ang mga programa kag serbisyo nga nasanto sa mga kinahanglanon sang komunidad.
Ang Department of Science and Technology (DOST) sa Western Visayas naghatag sang suporta paagi sa equipment provision, training programs, consultancy services, kag scholarships.
Ang Department of Labor and Employment (DOLE) Western Visayas nagpresentar naman sang youth employment programs, mga bulig para sa fresh graduates, kag livelihood grants para sa mga indibidwal kag community groups.
Samtang, ginhatagan naman pagtamod sang Technical Education and Skills Development Authority (TESDA) sa Western Visayas ang mga oportunidad sa vocational training kaangay sang tailoring, dressmaking, kag food processing, nga amo available sa TESDA-accredited centers sa Balasan, Iloilo.
Si Maria Aimee Sobrevega, Officer-in-Charge sang Iloilo Provincial Fisheries Office, naghatag sang overview sang BSC fisheries sa Pilipinas. Iya man ginpahayag ang U.S. Seafood Watch sustainability rating, nga may dako nga papel sa pagsakdag sang responsable nga fishing practices.
Ginsundan naman ini sang presentasyon ni Maria Lea Mandalejo, Training Specialist I, nga nakigbahin sang findings halin sa Socio-Economic Baseline Survey nga ginhiwat sa Barangay Igbon. Ang survey, nga ginpangunahan sang University of the Philippines Visayas kaupod ang Monterey Bay Aquarium kag BFAR, ginhatagan pagtamod ang household income levels, livelihood challenges, kag mga aspirasyon sang komunidad.
Nagpaabot naman sang iya pagpasalamat si BIGKAS Project Manager Franchalie Laurio.
“Dako gid ang amon pagpasalamat sa taga-BFAR nga amo gid ang nagabulig sa amon para makakuha pa sang mga additional nga project paagi sa iban nga NGA’s. Ini nga mga diskusyon kaupod ang iban nga ahensya sang gobyerno napalab-ot man naton ang aton mga kinahanglanon diri sa komunidad. Kabay pa mangin successful ini kag bululigan gid namon para sa bwas damlag man sang grupo kag barangay,” suno kay Laurio.
Sa pagtakop sang aktibidad, ang mga partisipante halin sa BFAR Region 6, partner agencies, kag lokal nga panguluhan nagpatigayon sang pagbisita sa Sitio Punta-ayan, kon sa diin ila ginobserbahan ang BSC landings kag ang nagapadayon nga community projects. (AAL/AGP/PIA 6 kalakip ang mga balita gikan sa BFAR Western Visayas)
