TAGBILARAN CITY, Bohol (PIA) — Nanginahanglan pa nga matan-aw sa inspection team sa Kapitolyo kon maayo ba ang kalidad ug subay ba sa kadaghanon nga gikinahanglan nga binhi sa mais nga gipalit niini agig tabang sa mag-uuma, sa dili pa kini ikatugyan aron ikapugas.
Kini subay sa pamaagi nga gilagda sa Corn Section sa Office of the Provincial Agriculturist (OPA), segun sa kasayuran nga gipaambit sa buhatan.
Didto sa press conference for Livelihood and Agri-fishery niadtong Hulyo 9, 2024, kauban ni Executive Assistant for Agriculture sa Kapitolyo nga si Nunila Pinat, matud niya nga nadeliver na ang mga binhi igpupugas sa mga Buhatan sa Municipal Agriculture Offices (MAO).
Apan, papas niya, naghuwat pa nga ma-inspeksyon kini, subay sa balaod sa procurement.
Usa ka bahan sa Kapitolyo ang gitahasan nga mosubay kon sakto ba ug wala ba matikasi ang Kapitolyo sa iyang gipamalit, segun sa panginahanglan sa mga mag-uuma.
Ang pagpanghatag sa libre nga binhi-igpupugas, ubanan sa abono, usa sa mga nakit-an sa OPA ubos ni Acting Agriculturist Larry Pamugas, nga makatabang aron mapun-an ang produksyon sa pagkaon, dinhi sa Bohol.
“Apan, nalangan ang supplier sa binhi sa mais sa pagdeliver,” ug matud pa ni Pinat, “diha pay posibilidad nga nadugay og deliver sa ka daku sa gikinahanglan usab sa Bohol.”
“Giseguro usab sa Kapitolyo nga ang mga binhi nga gideliver, sibo sa atoang need, dili sa supplier,” dugang ni Pinat.
Tambag ni Pinat sa mga mag-uuma sa mais, samtang nagpaabut nga mahimo ang inspeksyon sa taga Kapitolyo, sugdan na ang pagdaro, ilabi na kay aron dili masayang ang ginagmay na nga uwan-uwan. (RAHC/PIA Bohol/John Fel Atup)
