SYUDAD SANG ILOILO (PIA) — Nagpanaad ang mga gintangdo nga mga Barangay Information Officers (BIOs) sang syudad sang Iloilo sa pagbulig paalintun sang mga adbokasiya, programa, kag serbisyo sang gobyerno sa ila komonidad.
Sila ang nangin kabahin sa ginhiwat nga Hinun-anon kag oryentasyon sang BIOs nga ginpangunahan sang Philippine Information Agency (PIA)-Iloilo Information Center, kaupod ang Department of the Interior and Local Government (DILG)-Iloilo City, City Government Public Information Office kag Iloilo Science and Technology University (ISATU).
Ang mga BIOs nga ginbug-usan sang mga sekretarya, kagawad, kag Sangguniang Kabataan sang mga barangay ang nakatuon sang ila nga importante nga papel kag responsibilidad bilang mga partners sa pagpaambit sang insakto kag matuod nga impormasyon gikan sa gobyerno.
Gintalakay ni PIA-Iloilo information officer Liez’l Marie Ejeda ang hilikuton sang BIO para sa mga local government units kag ang mando ni Presidente Ferdinand Marcos, Jr. sa paghatag sang serbisyo sang gobyerno halin sa nasyunal lambot sa lokal nga lebel.
Nalakip man sa gindiskusyunan ang mga information gaps nga pagahatagan sang pagtamod kasubong sang pagtapna sang paglapta sang peke nga mga balita pinaagi sa pag-verify sang mga impormasyon, paghiwat sang pulong pulong, kag information dissemination activities nga makahatag sang access sa mga benepisyo halin sa gobyerno, kag pagkilala sang ginhalinan sang matuod nga impormasyon.
Sa pihak nga bahin, nangin kaupod man si Jay Andrade sang National Intelligence Coordinating Agency (NICA)-6 sa ginhiwat nga Hinun-anon kag iya ginsaysay ang importansiya sang ihibalo sa seguridad nga may dako nga benepisyo sa pagsiguro sang seguridad kag kaayuhan sang kadam-an.
Para naman kay Dr. Carmelo V. Ambut, ISAT-U Vice President for Research and Extension, iya ginpatpat ang paghatag sang kahulugan sang kolaborasyon sa tunga sang mga stakeholders kag ang epekto sang siyensiya kag teknolohiya sa komonidad.
Nagpabutyag man sang pagpasalamat si PIA-Iloilo InfoCen manager Lilibeth A. French sa mga opisyales sang mga barangay sa pagsuporta sang programa nga gahatag pagtamod sa komonidad kag ang ila nga bahin sa pagpaalintun sang mga hilikuton gobyerno. (AAL/LMLE/PIA Iloilo)
