ILIGAN CITY (PIA) — Aron suportahan ang paglambo sa gagmay’ng negosyo niining syudad, gipahigayon ang Barangay Micro Business Enterprise (BMBE) Forum isip kabahin sa Northern Mindanao Regional Innovation Exhibit (NorMinRIPE) 2025.
Nipartisipar sa maong kalihokan ang mga micro ug small business owners, mga bag-ong negosyante, ug mga nagtukod pa lang og start-up aron makakat-on sa mga proseso sa pagparehistro sa Department of Trade and Industry (DTI) ug masayran ang mga benepisyo nga ilang makuha gikan sa gobyerno.
Gipasabot ni Arim Mira, chief trade and industry specialist sa DTI-Lanao del Norte, nga tumong sa forum nga mahatagan og kahibalo ug kapasidad ang mga negosyante, labi na sa pagsugod sa ilang negosyo.
“This is actually designed specifically to capacitate business owners and future entrepreneurs. This forum is an opportunity to learn about the process of registering your business with the Department of Trade and Industry,” sumala niya.
Samtang mapasalamaton si Jeddy Bunayog, presidente sa Iligan Night Market Association, kay nakahatag ang maong kalihokani og dugang impormasyon nga ilang magamit sa pagpadagan sa negosyo ug pagpalig-on sa ilang koneksyon.
“This is a good opportunity for us also nga makakuha mi og mga information, ma-cascade namo sa among mga kauban. This would also give us added inputs para sa amo, not just alang sa among adlaw-adlaw nga operations or business, as well as ma-enhance among knowledge and linkages sa networks pod nga mandated sa business sector, DTI, and other agencies,” matod niya.
Gidasig usab ni Reggie Punongbayan, presidente sa Iligan Chamber of Commerce ug chairperson sa Region 10 ug Provincial MSME Development Councils, ang mga MSMEs nga magpadayon sa pag-innovate ug pagpangita og paagi sa pagpalambo sa ilang mga negosyo.
Nagpasalamat siya sa suporta sa mga ahensya sa gobyerno ug mipasabot nga pinaagi sa panaghiusa ug pagtambayayong, mas dali makab-ot ang malungtarong kalambo-an sa negosyo alang sa tanan. (LELA/PIA-10/Lanao del Norte)
