TAGBILARAN CITY, Bohol (PIA) — Aron patas-on pa ang kasayuran kabahin sa pag-pangtilapiahan, gisugyot sa Sangguniang Panlalawigan sa Bohol ang paghimong institusyon sa Tilapia Festival matag tuig sa ikatulo nga semana, o sa Nobyembre, 19-21.
Kini base na usab sa kasayuran gikan sa Bureau of Fisheries and Aquatic Resources (BFAR) nga nag-ingon nga ang Tilapia nahimo na nga nag-unang tinubdan sa protina sa mga Bol-anon, dala usab sa labing daku nga supply niini dinhi sa Bohol.
Pinaagi sa Tilapia Festival, mapadayag ang ekonomikanhon ug ang kamahinungdanon sa tilapia sa nutrisyon, maghatag og mga higayon sa pamaligya sa tilapia, magdugang sa katakus sa pagpamuhi ug sa pag-ugmad sa tilapia, samtang saulogon ang pagkamamugnaon sa Bol-anon sa paghimong mga lumba, indigay ug kompetisyon kabahin sa tilapia aron masuportahan pa niini ang local nga industriya.
Buot usab sa SP nga ikapakayab ang kamahinungdanon sa malungtaron nga pangisdaan ug pagdumala niini samtang maghatag og pagtutoksa mga gagmay nga mangingisda sa ilang buhat sa pagseguro sa pagkaon, panginabuhian apil na ang kahigayonan sa pagpangnegosyo aron mougmad ang katilingban.
Ang Tilapia Festival langkoban sa daghang kalihukan sama sa indigay sa pagluto, educational exhibits ug mga kulturanhong pasundayag nga magpadayag usab sa panaghiusa ug garbo sa komunidad.
Niini, ang Office of the Provincial Agriculturist maoy manguna sa mga kalihukan uban sa Bureau of Fisheries and Aquatic Resources (BFAR), Municipal Local Government Units (MLGUs), educational institutions, mga ahensya sa kagamhanan, People’s Organizations, ug pribadong sektor.
Ang kagamhanang Probinsyal magtagana usab og pundo alang sa pagpatuman sa mga probisyones niining gilaraw nga ordinansa. (RAHC/PIA Bohol)
