TAGBILARAN CITY, Bohol (PIA) – Gi-uyonan sa Executive Assistant for Agriculture nga si Nunila M. Pinat, ang pagpadayon sa Cloud Seeding Operations, ilabi na kay way below normal pa ang uwan nga nasinati karon.
Segun sa taho sa Philippine Atmospheric, Geophysical and Astronomical Services Administration (PAG-ASA) bisan kon gianunsyo na nga nagsugod na ang ting-uwan, way below normal pa gihapon ang nasinati nga pag-ulan.
Niini, dili pa makapananum ang mga lugar diin may mga basakan nga nagsalig sa uwan.
Matud ni Pinat sa conference nga gipahigayon, ang mga dam wala pa naka spill-out, ang mga watershed minus pa ug ang mga aquifer ni os-os pa, bisan pa gani sa tulo na ka semana nga pagpahinog sa panganod aron maka-uwan.
“Daghan pang mga kabasakan ang nangliki ug wala pa naka land preparation ang mga mag-uuma,” matud ni Pinat.
Ang cloud seeding operations, usa ka pamaagi diin ang mga panganod nga dili pa unta mahagbong isip uwan, sabudan og asin, aron mabug-at ug matagak, didto sa mga lugar nga gusto nga maka-uwan.
Sa tulo na ka semana nga cloud seeding operations, lisud pa gihapon sa mga may basakan nga sawod nga makasugod og daro, kay wala pa makatuhop sa yuta ang ginagmay nga uwan.
Matud pa sa National Irrigation Authority, manginahanglan pa og bali ig tulo ka adalw nga kusog nga uwan aron malihok sa mga mag-uuma ang mga basakan nga sawod, kana kon may uwan na nga makatuhop sa yuta.
Ang Bohol nakakuha og bali og 50 ka oras nga cloud seeding operations, apan gipugngan na kini sa mga politico nga nagtuo nga ang natural nga pag-uwan, makasapal na sa pagpasanap sa mga basakan aron madaro ug makapundo og tubig aron molahutay ang itisok nga tagud. (RAHC/PIA Bohol/Estephanie Aguilar-OPA)
