TAGBILARAN CITY, Bohol (PIA) – Kon siya ang pagbut-on, gusto ni Gobernador Erico Aristotle Aumentado nga gamiton sa kagamhanan ang mga luna nga wala magamit, isip lugar alang sa produksyon sa pagkaon.
Didto sa iyang pakigpulong atubangan sa panagtapok sa mga Province-led Agriculture and Fisheries Extension System (PAFES) workers nga gikan pa sa mga nagkadaiyang bahin sa nasud alang sa ilang tinuig nga planning workshop didto sa Panglao, ang gobernador mihangyo ngadto sa Department of Agriculture (DA) nga tabangan ang Bohol nga makakita og paagi nga katugotan nga gamiton ang mga luna nga wala magamit.
May mga yuta nga walay kapasidad-ang mga tag-iya sa pag-ugmad niini, kon mahimo, mapangitaan og paagi nga kaabangan, o ipailawom sa communal o commercial farming, mahimong ang mga tag-iya mao na kini ang ilang puhunan, aron magamit ang yuta, saysay sa gobernador.
Gitumbok usab niya ang mga biniyaan nga mga fishponds o punong.
“Laraw nato nga ato kining i-take-over, aron mapahiuli ug mapaayo, kauban sa DA, unya atong itugyan sa mga fishermen’s organization aron sila ang magpadagan ug magdumala, syempre ubos sa supserbisyon sa lalawigan ug sa DA,” sugid sa gobernador.
Sa panagat, gusto usab sa gobernador nga inay manghatag ang kagamhanan og gagmay nga mga sakayan bugsayan ug pumpboat, mas mayo nga kadtong dagkong bangka ang ihatag.
“Ang mga gagmay nga panagat, dinhgi lamang sa mga mabaw, ug menos ang kuha, mao nga kon dagko ang ilang sakayan, mahimo na sila nga moadto sa lawod diin tua ang daghang isda ug kaya na nila makig-atbang sa mga commercial fishers,” matud sa gobernador.
Didto sa panagtapok ang opisyal sa DA nga si Undersecretary Engr. Roger Navarro, ang undersecretary for Operations and Agri-Fisheries Mechanization ug undersecretary sa Rural Credit.
Ang laraw sa gobernador, nahaum usab sa damgo sa iyang administrasyon nga ang Bohol mobiya na sa mga kinaraan nga pamaagi sa panguma ngadto sa mas inutok ug siyentipikong pamaagi nga maoy gikinahanglan aron mahulipan sa lalawigan ang dakung kang-a sa produksyon sa pagkaon, nga maoy numero uno nga hinungdan sa taas nga presyo sa pagkaon dinhi. (RAHC/PIA Bohol)
