TAGBILARAN CITY, Bohol (PIA) – Mipahat ang provincial government of Bohol og P2,057,235 gikan sa 2024 General Fund alang sa suporta sa pagpalig-on sa mga programa sa panginabuhian sa Bohol subay usab sa mga paningkamot nga mapalig-on niini ang pagpatuman sa TESDA technical-vocational education and training (TVET) programs alang sa mga Bol-anon.
Kini, particular nga gamiton sa pagpabansay sa nga buot makat-on og mga katakus nga kasaligan sa panginabuhian ilabi na sa mga sector nga nahikawan, segun sa Sangguniang Panlalawigan (SP).
Pundo aron magamit isip scholarship sa mga kurso nga itanyag sa Provincial Training Centers (PTCs) sa Bohol nga anaa sa Bilar, Tubigon, Inabanga, ug sa usa ka pribado nga institusyon sa Cortes, kini alang sa mga mugbo nga surso ug programa alang sa mga sakop sa Women’s Associations, Solo Parents, Persons with Disabilities (PWDs), ug mga kabus.
Niini, ang PTC-Bilar motanyag sa 4 ka kurso, ang PTC-Tubigon may tulo, ang PTC-Inabanga may duha ug usa ka kurso usab itanyag sa private
institution sa Cortes.
Kining mga kurso naglangkob sa Pastry Making uban sa Entrepreneurship Training (Batch 1), Pastry Making ug Entrepreneurship Training (Batch 2), Food Processing sa PTC Tubigon, Steel Fabrication, Hilot Wellness Massage NC II sa PTC Inabanga.
Itanyag usab ang Bread and Pastry Production NC II didto sa Bohol International Learning College, Inc. (BILCI).
Ang TESDA, subay sa sugyot ni Gobernador Erico Aristotle Aumentado, magkatag niining mga tanyag sa libreng kurso sa mga kalungsuran aron mas daghan ang matabangan, ug mismo ang TESDA na ang mohimo sa screening gikan sa listahan nga nagasukad sa provincial government aron segurado nga kini, may haum nga kwalipekasyon subay sa lagda sa TESDA. (RAHC/PIA Bohol)
