TAGBILARAN CITY, Bohol (PIA) — Gikan sa P2.5 milyones nga maoy kasagaran na nga pahat alang sa cloud seeding operations sukad pa niadtong nangagi nga tuig, grekomendar na sa Provincial Disaster and Risk Reduction Management Council (PDRRMC) nga padak-an ngadto na sa P5 milyones.
Kini maoy gipadayag ni PDRRM Officer Anthony Damalerio didto sa Kapihan sa PIA, samtang gihisgutan ang pagpangandam aron makalahutay sa katalagman (Disaster Resilience Month) subay sa gihandum sa buwan sa Hunyo.
Kahinumduman nga niadtong Mayo 21, girekomenda sa PDRRMC ngadto sa Sangguniang Panlalawigan nga ideklara ang State of Calamity, dala sa nagkadaku og lanat sa epekto sa El Niño ngadto sa mga pananum, pangisdaan ug panghayupan.
Segun sa survey nga gipasiugdahan sa Office of the Provincial Agriculturist, sa 36 ka mga kalungsuran nga mihatag sa taho sa ilang pagka-apektado sa huwaw, mikabat na sa kinatibuk-ang P428 milyones ang kadaut ga natala.
Tungod niini, subay usab sa mga nangagi na nga kasinati-an, gisugyot dayun nga maghimo na sa Bohol og cloud seeding operations isip interbensyon aron makahimo ang mga mag-uuma sa pag-apas sa tingtanum sa sakto nga panahon.
Apan sa dagan sa pagpangita og ikasabut nga maghimo sa cloud seeding, nasayran sa konseho nga manginahanglan og ubay-ubay nga uwan ang Bohol, kon ugaling gustohon nga mas daghan ang makatanum.
Sa kasamtangan nga kwenta, ang P2.5 milyones, may 25 lamang ka oras nga lupad sa eroplano nga magsabud og asin, hinungdan nga kon maka-uwan man ugaling, dili kini makataslop sa yuta.
Didto nahukman sa PDRRMC nga pasakaan ang pahat para sa cloud seeding gikan sa P2.5M ngadto na sa P5M.
Sa pagka karon, subay sa Technical Working Group sa cloud seeding, nanginahanglan pa og daghang flaying hours nga pundohan, ug maayo na lang gani kay ang Department of Agriculture pinaagi sa ilang Bureau of Soils and Water Management (BSWM), nakapagawas alangs a Bohol sa P5M nga pundo gikan sa regular nga pahat sa ahensya alangsa pagsuporta sa pagpananum ug pagprodyus sa humay.
Bisan pa sa pagsugod na sa uwan-uwan, ug sa pagsulod sa La Niña, kuwang pa gihapon ang uwan aron makapangandam ang mga mag-uuma sa ilang umahan alang sa tuingtanum niining buwana.
Aron dili na manginhanaglan pa nga magkasuliran og asa mangita sa pundo alang sa susamang interbensyon, gawas sa PDRRM nga magpahat nag P5M, may nga buhatan pa usab sa Kapitolyo nga pun-an ang ilang mga pundo, nga mahimo usab nga ire-allign alang sa cloud seeding, saysay ni Damalerio didto sa Kapihan sa PIA.
Hinuon, ang girekomendar sa PDRRM, moagi pa sa Local Finance Committee sa Kapitolyo ug kon maaprobahan, usa ka resolusyon ug ordinansa sa Sangguniang Panlalawigan ang makapahimo niining balaod sa pagsaka sa pahat. (RAHC/PIA Bohol)
