TAGBILARAN CITY, Bohol, Jan. 4 (PIA) — Wala pa mahuman ang Pasko sa mga taga Kapitolyo.
Kini human gipaabut pa nga sa dili madugay, aprobahan na sa Sangguniang Panlalawigan (SP) ang ordinansa nga magtugot sa mga kwalipekado nga empleyado sa Kapitolyo nga modawat sa tag P20 Mil isip 2022 Service Recognition Incentive (SRI) ug one-time-Rice Assistance (RA), subay sa Administrative Orders No. 1 ug 2 nga gipagawas sa Buhatan ni Presidente Ferdinand Marcos Jr sa mi-aging semana.
Alang niini, kinatibuk-ang P39.250 milyones ang himoan og appropriations ordinance aron kapundohan gikan sa mga natigum ug wala magamit nga personnel services sama sa sweldohon unta apan wala pay napahimutang nga trabahante sa pwesto, ug sa wala magamit nga Maintenance and Other Operating Expense (MOOE) sa 2022 Annual Budget, segun pa ni Bise Gobernador Dionisio Victor Balite.
Ang kuhaan sa pundo nga realigned PS ug MOOE, una na nga gipamatuod sa Provincial Accountant ug sa Provincial Treasurer, uban usab sa pag-tugot ni Gobernador Erico Aristotle Aumentado, aron mapundohan ang nahisgutang SRI ug RA.
Gawas sa tag P20 mil nga SRI, ang pagtugot sa SP pinaagi sa Ordinansa magtugyan usab sa mga kwalipekado nga empleyado sa tag 25 kilos nga bugas, segun pa sa tinubdan sa Sangguniang Panlalawigan.
Kahinumduman nga sa pagpagawas sa Presidente sa Administrative Order kabahin sa SRI ug sa RA, nagpagawas dayon og guidelines and Department of Budget and Management (DBM) ug ang National Food Authority uban sa mga nasudnong ahensya sa pagpahigayon sa nahisgutang kalipayon sa mga empleyado. (RAHC/PIA7 Bohol)
