KALIBO, Aklan (PIA) — Eapit daywang buean bago magtapos ro dag-on hay naabot eon it Isla it Boracay ro ana nga pang sang dag-on nga target sa pag-bot it mga turista nga 1.8 milyon.
Ro rekord it Malay Municipal Tourism Office gapakita nga sa hara nga Nobyembre 7, 2023, ro isla hay nag-abi abi it kabilugan 1,825,758 ka mga bisita.
Sa nasambit nga numero, 1,433,024 kara hay mga lokal nga mga turista; 357,066 mat-a hay mga dumoeo-ong turista; ag 35,668 ro mga Overseas Filipino Workers ukon overseas Filipinos.
Suno sa local tourism office ro buean it Abril ro nakarehistro nga may pinakamaabo nga mga bisita nga nabaton nga may 213,736; ginsundan raya it Hulyo nga may 207,696 ka mga pag-abot it mga turista; ag buean it Mayo nga may 207,512.
Ginhambae ni Malay Municipal Tourism Officer Felix Gregorio Delos Santos nga ro lokal nga pang gobyerno it Malay hay eagko ro pagpati nga maka-abi-abi ro isla it mga 2 milyon nga mga bisita sa hara nga dag-on dahil man sa sigidas nga pag-inabo it turista sa Isla.
Mga turista masadya nga nagatikang sa maputi ag mapino nga baeas it Isla it Boracay. Base sa rekord it Malay Municipal Tourism Office sa hara nga Nobyembre 7, 2023, ro isla hay nakabaton eon it kabilugan 1,825,758 ka mga bisita. (PIA Aklan)
Ku 2022, nakabaton ro sikat nga isla it may kabilugan 1,759,592 ka mga turista. Hara hay nagapakita it ap-at porsyento nga pagtaas sa tourist arrivals sa hara nga Nobyembre 7.
Gin-ako it Malay tourism office nga ro datus it hara nga 2023 sa tourist arrival hay manubo kumpara sa lebel bago magpandemya, pero ro inbound tourism market makara hay nagapakita it sensyales sa pagtinaas it pag-abot sa Isla it Boracay nga may 5,000 asta 6,000 turista kada adlaw.
