SYUDAD SANG ILOILO (PIA) – Nagpatigayon ang Bangko Sentral ng Pilipinas (BSP) – Iloilo branch sang isa ka financial education campaign sa pila ka mga estudyante sang Iloilo Central Elementary School sang Pebrero 24, 2025.
Ang kahiwatan nga kabahin sang social responsibility activity sang BSP-Iloilo nagatuyo nga tudluan ang mga estudyante nga mangin “financially healthy” sa lamharon nga edad.
Nagbukas man sang bank account ang BSP-Iloilo kaupod ang private partner sini nga BDO Unibank Inc. para sa 200 ka kwalipikado nga Grades 5 kag 6 students sa ICES nga may inisyal nga deposito nga P50 gikan sa mga empleyado sang BSP.
Ginpahayag naman ni BSP-Iloilo acting area director Doreen Santerva nga kinahanglan nga mabal-an sang mga kabataan ang importansiya sang pagtipid nga ila gid magamit sa ila pagdako.
“This is for the grade schoolers for them to know the value of savings, ang value sang kwarta nga makabalo sila magtipig kag magsinop para madala nila ang habit ng aini asta sa magdako sila,” siling ni Santerva.
Ginhingyo man sini ang mga ginikanan nga tudlu-an ang ila mga kabataan sang importansiya sang pagtipid agud mangin responsable ang mga ini sa paggamit sang kwarta.
“So, sa mga ginikanan, tudluan gid naton ang aton mga bata sang value sang money kag tudluan gid naton sila nga magtipid,” siling sini.
Magluwas sa paghiwat sang financial literacy campaign, nagpatigayon sang mini-games ang BSP-Iloilo, kun sa diin nakabaton sang school supplies ang mga nagdaug. (AAL/JNH/PIA Iloilo)
