NAGPAABUT SA UPDATE. Kon mahuman na ang updated Bohol Economic Development study, kini maoy gamiton sa BSP sa paghukom kon sugdan na ba dayun ang pagtukod sa ilang buhatan dinhi, pasanut ni BSP Visayas Regional Director Anne Clara Oville. (PIA Bohol)
TAGBILARAN CITY, Bohol (PIA)— Nagpaabut pa ang mga tinugyanan sa Bangko Sentral nga Pilipinas (BSP) nga mahuman ang updating sa pagtuon sa ekonomikanhong pag-ugmad sa Bohol, aron makahukom sila nga sugdan na o dili pa ang pagtukod sa ilang mismong sanga nga buhatan dinhi sa Bohol.
Kini maoy gipaambit ni BSP Visayas Office Regional Director Anna Clara Oville, atul sa gipahigayon nga 2025 Media Information Session alang sa lalawigan sa Bohol, Marso 25.
“Amo-a na ang property dinhi,” pasalig ni Oville apan nagpadayon pa ang updating sa branch study kalabut sa ekonomikanhong pag-ugmad sa Bohol.
Kahinumduman nga ang BSP una na nga mipadayag sa ilang kasibut nga maghimo nag buhatan dinhi sa Bohol, gani, diha nay mga pasiuna nga seremonyas subay niini, pipila na ka tuig ang minglabay.
Hinuon, gipasalig sa BSP nga bisan pa niini, ipadayun nila ang paghatag og igo nga imbentaryo sa panginahanglan sa kwarta dinhi sa Bohol.
“Rest assured nga alang sa tanan nga alokasyon sa Sugbo, susama usab kadaghan ang alokasyon nga ihatag sa Bohol kon ang panginahanglan sa cash ang hisgutan,” dayag ni Oville. (RAHC/PIA Bohol)
