MALAYBALAY CITY (PIA)–Sa tinguha nga mapaduol sa katawhan ang mga nag-unang serbisyo sa gobyerno ang opisina ni Bukidnon 2nd District Congressman Jonathan Keith T. Flores nagpahigayon og coordination meeting niadtong Oktubre 11, aron pagpangandam isip host sa ipahigayon nga Bagong Pilipinas Serbisyo Fair (BPSF) karong Nobyembre 11-12, 2023.
Tumong sa BPSF nga maserbisyohan sa gobyerno ang katawhan sa 83 ka mga probinsya sa tibuok nasud.
Kini nga mga serbisyo naglakip sa Kadiwa ng Pangulo diin ang mga baligya mapalit sa mas ubos nga kantidad, Passport on wheels, ug Driver’s license registration/assistance.
Magtanyag usab og mga serbisyo ang nagkalain-laing ahensya sa gobyerno, sama sa Department of Health, Department of Social Welfare and Development, Philhealth, PagIBIG, Social Security System, ug uban pa
Si Bukidnon 2nd District Representative Atty. Jonathan Kieth T. Flores ang ga-preside sa meeting aron maseguro nga han-ay ang pagpahigayon sa Bagong Pilipinas Serbisyo Fair dinhi sa probinsya. (BGE/PIA-10/Bukidnon)
Gi-awhag ni Cong. Flores ang katawhan sa Bukidnon nga pahimuslan ang duha ka adlaw nga programa, diin gilauman ang partisipasyon sa kapin 40 ka mga ahensya.
“Dili na hagit ang pagpangita sa gobyerno karon, tungod kay ang gobyerno mismo ang magdala sa mga serbisyo direkta sa katawhan,” matud sa kongresista.
Dugang pa ni Flores nga ang BPSF maghatag ug kahigayonan sa mga residente sa Bukidnon nga maka-access sa mga serbisyo sa gobyerno nga walay bayad. (BGE/PIA-Bukidnon)
Kapin 40 ka mga ahensya sa tibuok Region 10 ang misalmot sa gipahigayong coordination meeting, Oktubre 11, nga gipahigayon sa Bukidnon State University . (BGE/PIA-10/Bukidnon)
