SYUDAD SANG ILOILO (PIA) – Liwat nga ginpatigayon ang Calle Real Night Market sang Nobyembre 15 tubtob 17 bilang pagpakita sang timprano nga pagsaulog sang Christmas season sa syudad.
Ginpahayag ni Arch. Wilfredo Sy Jr., technical lead sang kahiwatan pinaagi sa MICE (Meetings, Incentives, Conferences, and Exhibitions) Center, nga ang night market isa ka selebrasyon sang lokal nga kultura, gastronomy, kag arts, kung sa diin ang una sini nga edisyon ang nangin madinalag-on.
“Following its (first Calle Real Night Market) success and due to public demand, we have decided to do a Christmas edition,” pahayag ni Sy.
Lakip sa mga nakipagbahin sa Calle Real Christmas Night Market amo ang mga lokal nga producer gikan sa Merkado Lokal; mga ambulant vendor; mga katapo sang Iloilo Hotel, Resorts, and Restaurant Association (IHRRA); mga non-food kag retail vendor kag iban pa nga gin-imbitahan nga street performers.
Ginsiguro man ni Sy nga nakipag-istorya ang MICE Center sa mga manugbaligya para sa presyo sang mga pagkaon kag iban pa nga mga produkto, kag ang insakto nga paghaboy sang basura sa palibot.
Isa naman ka porsyon sang heritage zone ang ginsiraduhan sa trapiko sa partikular nga mga oras para mahatagan sang pwesto ang 100 ka mga stalls sang mga manugbaligya.
Ginpahayag ni Traffic and Transport Management Office(TTMO) head Ret. Col. Uldarico Garbanzos nga nagpatuman ang road closure halin sa dalan Guanco pakadto sa Mapa umpisa alas singko sa hapon tubtob alas dose sa tungang gab-humalin Nobyembre 15 tubtob 17, 2024.
“We have maximum deployment of our personnel for enforcement and clearing. We also have augmentation,” siling ni Garbanzos.
Ara sa halos 15,000 ka mga bisita ang nakipagbahin sa una nga edisyon sang Night Market sang tinalikdan nga Charter Month sang Agosto, kag mas damo pa gid ang ginabanta nga magkadto sa subong nga edisyon, suno sa Iloilo City Government.
Naglab-ot man sa P1.2 milyones ang kita sa gihiwat nga una nga edisyon sang Night Market. (AAL/JNH/PIA Iloilo)
