CAMIGUIN (PIA) — Aron mapalig-on ang mga lokal nga inisyatibo sa saktong pagdumala sa basura, ang probinsyal nga gobyerno sa Camiguin, pinaagi ni Gob. Xavier Jesus Romualdo, nakig-partner sa Coca-Cola Beverages Philippines, Inc. (CCBPI) alang sa pagkolekta ug pag-recycle sa polyethylene terephthalate (PET) bottles sa Camiguin.
Pinaagi sa bag-ohay lang nga gipirmahang memorandum of agreement, maghatag ang CCBPI og baling machine sa probinsyal nga gobyerno aron makatabang sa pag-recycle sa PET bottles ngadto sa bag-ong, food-grade nga rPET bottles, nga dako ang ikatabang sa pagminos sa epekto sa plastik nga basura sa kalikupan.
Kini nga baling machine makatabang sa pagkolekta ug pagproseso sa PET bottles, nga kasagaran gigamit para sa tubig, soft drinks, ug uban pang ilimnon, sa wala pa ipadala kini ngadto sa PETValue Philippines, ang unang bottle-to-bottle recycling facility sa nasud.
“Makatabang ang rPET sa pagtigom sa mga kahinguhaan ug pagminos sa plastik nga basura. Pinaagi sa atong kolaborasyon, dili lamang kita maghimo og positibong kausaban sa pagdumala sa basura, apan magtukod usab kita og mas limpyo ug mas luwas nga kalikupan para sa mga sumusunod diri sa atong probinsya,” matud ni Romualdo.
Gidugang sa gobernador nga ang maong kolaborasyon kabahin sa mas lapad nga paningkamot aron masiguro nga ang mga pag-uswag sa teknolohiya sa recycling makatabang sa pagpreserba sa mga kahinguhaan, samtang ang Camiguin magpabiling usa ka maayong ug malahutayon nga dapit nga puy-an. (RTP/PIA-10/Camiguin)
