SYUDAD SANG ILOILO (PIA) — Magalab-ot sa P2 million ang bulig pinansyal nga igahatag sang gobyerno probinsyal sang Iloilo sa siyam ka mga tribu nga magapasundayag sa 2025 Kasadyahan sa Kabanwahanan sa Enero 25.
Ang kutob sa mga kabanwahanan nga lakip sa second to fifth class ang magabaton sang P2 million kaangay sang Cabatuan (Tinuom Festival), Leon (Kaing Festival), Maasin (Tultugan Festival), Igbaras (Tangyan Festival), Anilao (Banaag Festival), New Lucena (Cry of Jelicuon Festival) kag San Rafael (Tawili Festival).
Samtang, ang mga kabanwahanan nga napaidalom sa first class kasubong sang Calinog (Hirinugyaw Suguidanonay Festival) kag Dumangas (Haw-as Festival) ang magabaton naman sang P1.5 million bilang bulig pinansyal.
Suno sa Kapitolyo, isa ini ka upgrade sa P1million subsidy nga ginahatag sa mga tribu sa ini nga Kasadyahan.
Ginpakigbahin man ni Gov. Arthur Defensor Jr. nga ginahandaan sang gobyerno probinsyal ang mas dako, labing engrande nga festival sang tanan nga festivals sa probinsya sa masunod nga tuig.
Dugang pa, gina-develop ang Kasadyahan sa Kabanwahanan bilang “cultural stage of the municipalities” nga magapakita sang kina-iya, dunang manggad kag tradisyon sang probinsya sang Iloilo.
Madumduman nga nagpasundayg ang mga tribu sang ila tagsa ka performance sa ginhiwat nga launching, press conference, kag costume exhibit sang Disyembre 22. (AAL/LMLE/PIA Iloilo/Capitol News)
