SYUDAD SANG ROXAS, Capiz (PIA) — Nagapadayon ang pagpanghanda sang mga food packs bilang reserba sang lokal nga pangulohan sang probinsya sa ti-on sang La Niña kag iban pa nga mga emerhensiya.
Ginpahayag ni Atty. Sheila Artillero nga action officer sang Provincial Disaster Risk Reduction and Management Office sa Kapihan nga programa sang Capiz Information Center sang Philippine Information Agency kag Capiz Provincial Government Communications Group nga ang nasambit nga inisyatibo ang nagatuyo nga mas madasig nga mapaabot ang mga bulig ukon relief goods sa mga nagakinahanglan nga mga pumuluyo.
Samtang, ginapabugal man sang PDRRMO ang airconditioned nga mobile command center, duha ka mga speedboat, tatlo ka mga ambulansya, kag yunit sang truck nga sarang magamit sa pag-respondi kag pagdul-ong sang bulig sa ti-on sang emerhensiya.
Ang PDRRMO ang may hubon man sang Search and Rescue (SAR) nga ginabug-usan sang sampaton nga mga miyembro sa search and rescue operation.
Nahibaluan nga balahaan ang mga manubo nga lugar sa probinsya sa ti-on sang pag-inulan.
Gindugang pa ni Artillero nga nagapadayon ang contingency planning sa mga komunidad sa kabaranggayan agud nga mapabaskog ang kapasidad sang mga pumuluyo kon ano ang himuon kon may kalamidad.
Gindihon man sang probinsya ang El Niño kag La Niña Task Force sadtong bulan sang Mayo pinaagi sa Executive Order No. 13 ni Gobernador Fredenil Castro agud nga labi pa gid nga mapabakod ang pagpaabot sang bulig kag mapahagan-hagan ang epekto sang El Niño kag La Niña sa katawhan, palangabuhian, kag ekonomiya.
Ginlunsyar man sang probinsya ang “Project Akad” ukon dredging sang Panay River sadtong bulan sang Mayo agud nga makuha ang bun-od nga naga-upang sa alagyan sang tubig paguwa sa dagat.
Ang Capiz ang naka-eksperyensiya sang malapnagon nga pagbaha sang 2022 bangud sang inadlaw nga pag-inulan nga dala sang Tropical Depression Agaton kon sa diin 365 sa 473 ka mga kabaranggayan sa probinsya ang naapektohan sang pag-inulan kag pagbaha.
Subong man, nasundan pa gid sang isa ka pagbaha sang Oktubre 2022 bangud sang Severe Tropical Storm Paeng nga nakaapekto naman sang 270 ka kabaranggayan tungod sang tubig baha. (AGP/AAL/PIA Capiz)
