SYUDAD SANG ROXAS, Capiz (PIA) — Nagtilingob ang Provincial Health Office (PHO), Department of Health (DOH) Capiz, kag Ivisan Rural Health Unit (RHU) sa pagbulig sa isa ka severely malnourished (SAM) nga bata halin sa Brgy. San Agustin sa banwa sang Ivisan.
Suno kay Josephine Moises, District Nutrition Program Coordinator sang PHO, wala dayon nahibaluan ang estado sang bata bangod nagbata ang iya iloy sa ila lang nga panimalay.
Dugang pa ni Moises, ang bata lapit na mag duwa ka tuig apang indi gihapon makatindog kag makalakat bangod sa grabe nga malnutrisyon.
“Hindi gid makalakat ang bata kay kulang gid ya ang iya weight kag mostly sa mga malnourished children isa ina sa mga effect ang hindi maka-walk,” pahayag niya.
Suno sa iya, ginapaidalom na subong ang bata sa Philippine Integrated Management of Acute Malnourished (PINAM) program bilang isa sa mga intervention sang PHO.
“Isa sa mga protocol sang PINAM program is i-assess ang bata kung may mga complications. Wala man siya sang other health complications, manubo lang gid ang iya weight kay kulang siya sa pagkaon,” suno kay Moises, samtang iya man ginpahayag nga ang Ivisan Municipal Nutrition Action Officer (MNAO) designate nga si Amphyphine Bautista ang padayon nga naga monitor sa estado sang kondisyon sang bata.
Ginpahayag man ni Dr. Leah Del Rosario Health Officer I kag Provincial Nutrition Officer sang PHO sa iya pagbisita kaupod ang Provincial Nutrition Council (PNC) nga kinahangalan na hatagan ang bata sang ready-to-use therapeutic food (RUTF) agud masigurado nga makakuha siya sang required nga nutrients kag calories.
Sa pihak nga bahin, ginpasiguro man sang punong barangay sang Brgy. San Agustin nga si Danny Loberes sa PHO kag PNC nga magabulig sila sa mag iloy bangud gina-upod man sila sa feeding program sang elementary school kag sang daycare center. (AGP/PLF/PIA Capiz)
