SYUDAD SANG ROXAS, Capiz (PIA) — Nagkalainlain nga mga aktibidades ang nakalinyada para sa Capiztahan 2025 nga selebrasyon kaangot sa ika-124 nga anibersayo sang pagpundar sang civil government sang Capiz.
Ang selebrasyon ang magasugod sa Abril 1 kag magatapos sa Abril 6.
Kalakip sa mga bisita nga ginapaabot sa selebrasyon amo si Sec. Christina Garcia Frasco sang Department of Tourism kag iban pa nga mga opisyal sang DOT nga magalantaw sang mga highlights sang Capiztahan sa Abril 5.
Kalakip sa mga balantayan sa maabot nga Abril 5 amo ang Maragtas Capiznon Historical Parade, dance drama cultural performances, kag ang seafood feast ukon “Surambaw.”
Ang anom ka adlaw nga kahiwatan ang ginalakipan man sang Saot Capiz nga kompetisyon kag pasundayag sang mga Capisnon nga folkdance, Farmers’ Market, trade fair, coronation night sang Hangaway kag Lin-ay sang Capiz, job fair, unveiling sang Cong. Dinggoy Roxas Monument sa Roxas City plaza, pyromusical show, Capiztahan Aquaman 3.0, Plantamania, torch parade, kag madamo nga iban pa.
Samtang, sa Abril 15, magapatigayon sang misa pasalamat sa Immaculate Conception Metropolitan Cathederal sa Roxas City ang lokal nga panguluhan sang probinsya kadungan sang 124th Foundation Day sang Civil Government sang Capiz.
Matandaan nga ginpasar sang United States Philippine Commission sadtong Abril 15, 1901 ang Act No. 115 para sa pagtukod sang sibil nga gobyerno sang Capiz.
Ang foundation day sang Capiz ang kadungan man sa anibersaryo sang kamatayon sang Capiznon nga si Pres. Manuel Roxas nga napatay sadtong tuig 1948. (AGP/AAL/PIA Capiz)
