SYUDAD SANG ROXAS, Capiz (PIA) — Ginpirmahan ni Gobernador Fredenil H. Castro sang probinsya sang Capiz ang Provincial Ordinance No. 377 nga magahatag sang isa ka adlaw nga pahuway sa trabaho nga may bayad kag wala gina-iban sa leave credits para sa mga opisyal kag empleyado sang lokal nga pangulohan sang probinsya.
Ang pinakauna nga ordinansa sang Capiz nga kaangot sa boluntaryo nga pagdonar sang dugo nga programa ang ginalauman nga labi pa gid nga magapasangkad sang kampanya sa pagdonar sang dugo sa probinsya.
Ginpahayag ni Ketch Armiza nga Blood Donor Recruitment Officer sang Philippine Red Cross – Capiz Chapter ang nasambit nga prebilihiyo nga ginasaad sa ordinansa ang magapalapit pa gid sa katawhan sang kampanya sa pagdonar sang dugo kag magapataas sang recruitment rate ilabi na sa mga opisyal kag empleyado sang gobyerno.
Samtang, ginahulat pa sang PRC ang Implementing Rules and Regulations agud nga maplastar sang maayo ang mga pagsulundan sang ordinansa.
Gindugang pa ni Armiza nga ipabugal sang PRC ang nasambit nga inisyatibo sa iban nga mga lugar agud nga pamarisan sang iban kag labi pa nga mapabakod ang kampanya sa pagdonar sang dugo.
Nahibaluan nga ang ordinansa ang gindihon ni Atty. Paul Ivan Baticados nga Philippine Councilors League – Capiz Chapter president kag ex-officio member sang Sangguniang Panlalawigan.
Subongman, natigayon ang kasuguan sa bulig nanday bise-gobernador kag PRC Board of Director Jaime Magbanua kag mga kaupdanan sang Provincial Board kag ni Provincial Legal Officer kag PRC Board of Director Leobeth B. Deslate.
Siling pa ni Armiza, ang masunod nga plano kaangot sa napasar nga ordinansa amo ang pagpatigayon sang bloodletting kaupod sa mga opisyales kag empleyado sang Kapitolyo.
Base sa rekord sang PRC-Capiz, naglab-ot sa 13,502 ka yunit sang dugo ukon 1.65 ka porsiyento sang kabilogan nga populasyon sang probinsya ang naka-donar sang dugo sang tuig 2023.
Ang tanan nga 17 ka mga lokal nga pangulohan sa probinsya ang nakalab-ot naman sang ila tuigan nga target nga isa ka porsiyento sang ila tagsa ka populasyon ang nagakadapat nga makadonar sang dugo sang nagligad nga tuig.
Ang mga talalupangdon nga mga indibidwal nga blood donors kag mga nag-organisa sang pagdonar sang dugo sa probinsya sang tuig 2023 ang pagakilalahon sa Sandugo Awards sang PRC kag Provincial Health Office sa Hulyo sa ti-on sang Blood Donors Month nga selebrasyon.
Ginalauman man nga maipahibalo ang Provincial Ordinance No. 377 sa palaabuton nga pagtililipon. (AGP/AAL/PIA Capiz)
