SYUDAD SANG ROXAS, Capiz (PIA) — Ginpasidunggan ni Pangulong Ferdinand Marcos Jr. ang Capiz State University (CapSU) sa ginpatigayon nga Presidential Awards for Outstanding Micro, Small, and Medium Enterprises (MSMEs) sa Malacañang.
Isa ang CapSU- Intellectual Property Management Office (IPMO) sa 18 ka mga nakabaton sang Presidential Recognition for Outstanding Development Partners in the Improving Access to Technology and Innovation category sa sini nga tion.
Pinaagi sa Center for Advancing Partnership, Stimulating Upscale and Learning Enterprises (CAPSULE) Technology Business Incubator, nagaserbe ini nga technology transfer kag commercialization arm sang CapSU-IPMO para mas mapasanyog ang pagnegosyo sang mga MSMEs sa probinsya.
Nahibaluan nga nagaserbe nga convergence hub ang CAPSULE para sa mga prospective technology adopters, investors, kag users nga may kaangut sa industriya sang agrikultura kag aquaculture.
Suno kay Dr. Edith C. Alfon, presidente sang CapSU, nga ang ila pagbaton sang award halin sa Presidente ang isa ka pamatuod sang ila promisa sa pagpaumwad sang abilidad sa pagnegosyo kag mangin self-sufficient ang mga Capiznon, ilabi na gid ang mga imol.
Ginpahayag man ni Alfon nga pamaagi sa Agri-Aqua Technology Business Incubator (ATBI) sang unibersidad, makaapekto ini sa pagpasangkad sang mindset kag kabuhi sang ila mga incubatees.
Iya man ginpasalig nga ang unibersidad ang nagahatag importansya sa pagtransform sang kabuhi sang ila mga incubatees sa pag-engage sa ila sang responsible business management para maging tulay sa pagbag-o sa ila tagsa ka komunidad magluwas sa pagtudlo sa mga incubatees sang mga basic sang pagnegosyo. (AGP/PLF/PIA Capiz)
