Nahimo nga modelo ang Carood Watershed Model Forest sa Forest Landscape Restoration Mechanism (FLRM) sa Pilipinas. Sa tabang sa UN FAO, nahimoan og mga lakang ang gikinahanglang pagpatunhay sa Carood, ug kini karon ang gipaambit usab sa mga sakop sa konseho niini ngadto samga langyaw nga sakop sa International Model Forest Network nga nagtigum didto sa Anda, Bohol. (PIA Bohol)
TAGBILARAN CITY, Bohol (PIA) — Gilauman nga sa pagtak-op sa tinuig nga Advisory Council Meeting sa International Model Forest Network (IMFN) nga gipahiluna mismo sa Carood Watershed Model Forest (CWMF) Management Council, nga may mabawon silang mga maayong bansay gikan sa mga pamaagi sa pagdumala sa mga kalasangan ug tubig saluran sa Carood.
Kauban sa mga mingtambong sa tigum ang mga tinugyanan sa IMFN sa Japan, Thailand, Indonesia, Vietnam, Cambodia, Korea.
Ang Carood Watershed nga may 20,479 ektaryas nga mingsangkad sa unom ka mga kalungsuran sa kasubangan nga bahin sa Bohol nagalangkob sa halos tibuok Alicia, katunga sa Candijay, upat ka bahin sa Ubay ug mga gagmay nga bahin sa Mabini, Pilar ug Guindulman.
Kahinumduman nga niadtong 2018, human nahulma ang local management council niini niadtong 2003, gipatuman ang Forest Landscape Restoration Mechanism (FLRM) sa Carood, kauban ang United Nations’ Food and Agriculture Organization (UNFAO), aron himoon kining pilot model forest project
Kining restoration gilantaw usab nga maoy solusyon sa nagka-umaw nga yuta ug pagpangalaka niini, maghimog solbad sa perming sunog pinaagi sa paghimo og mga fire break lines ug paghimo og mga sawranan sa dagayday sa tubig lakip na ang paghimog mga karsada aron mapamaayo pa ang akses dinhi.
Nunot niini, diha nga gipaapil na ang Carood sa IMFN niadtong 2010, gisugdan usab sa management council niini ang pagpatuman sa mga bansay sa malungtaron nga pagdumala, pagpalig-on sa panalipod batok sa nagkausab nga panahon ug paglahutay niini, pagpahimutang sa mga saluran sa tubig ug pagpalig-on sa mga kapilian sa panginabuhian didto sa Carood.
Dugang pa, ang CWMF gihimong pilot area sa pamaagi nga FLRM subay sa Philippine National Action Plan on Forest and Landscape Restoration, kauban sa FAO ug pagpahiluna sa fire lines tadlas sa matag 20 hectares aron dili na makakatay pa ang sunog dinhi.
Gisugyot ngadto sa mga katawhan nga nanimuyo sulod sa watershed nga mananum og cash crops sama sa bolanghoy ug sisal, nga maayong himoonon og pisi, aron sila na usab mamintinar sa firelines.
Sa kusog nga bul-og sa tubig nga kadagaran maoy mopabaha sa Alicia ug Candijay, naghimo ang mga katawhan didto og duha ka mga saluran sa tubig aron menosan ang agas paingon sa kapatagan, kini na usab maoy nahimong pundohanan sa tubig nga makapundo og 450 ka metro-kubiko nga masayang na unta kay mohunob ug mobanlas sa patag. (RAHC/PIA-7 Bohol)
