SAN JOSE, Antique (PIA) — Masobra sangka gatos nga kabataan nga “child laborers” ukon mga lamharun nga trabahador ang nakabaton kang regalo halin sa “Project Angel Tree.”
Ini gin-organisar kang Department of Labor and Employment (DOLE) kag Public Employment Services Office ka Hamtic kag kang Gobyerno probinsyal kang Antique.
Ang pagpanagtag kang regalo may kaangtanan man ta selebrasyon kang World Day Against Child Labor kang Hunyo 12, 2024.
Sa amo man nga okasyon, ang mga ginikanan kadyang child laborers kag mga lokal nga opisyales nagpanaad nga anda isikway ang ano man nga sahi kang pagpang-abuso sa mga kabataan kag anda himuon ang anda masarangan agud mapatuman ang andang kinamatarong.
Si Ma. Cecilia Acebuque, Provincial Director kang DOLE, nagpasiguro sa mga ginikanan nga ang gobyerno nagapaninguha nga sanda mabuligan, gani nagakadapat man nga maghimo sila ka anda masarangan para sa ikamayad ka andang kabataan.
Ana man ginpadumdom ang mga ginikanan nga pwede man mataw-an ka obra ang mga kabataan para sanda mahanas sa sari-sari nga kinaadman basta dya indi makahalit sa anda ikaayong lawas, indi mabug-at ukon magsobra sa sanda kapasidad, kag indi maapektohan ang anda iba pa nga kinamatarong parehas kang pag-eskwela.
Sa selebrasyon kang World Day Against Child Labor, ang DOLE Antique nag-implementar kang Project Angel Tree para makatipon kang mga sari-sari nga donasyon parehas kang mga garamiton sa pag-eskwela, pinutos nga pagkaon, kag iba pa nga kagamitan para sa kabataan.
Suno kay DOLE Antique Senior Labor and Employment Officer Benjie Requintina, ang mga natipon nga regalo ginpanagtag sa 134 ka mga lamharun nga trabahador nga kabataan halin sa 14 ka kabarangayan kang Hamtic.
Kabahin man kang amo nga lihuk ang pagpaathag tuhoy sa kinamatarong kang bata nga ginpatigayon kang Philippine Information Agency-Antique.
Samtang, ang representante kang Technical Education and Skills Development Authority nagpaathag man kang mga “training programs” nga pwede maagum kang mga ginikanan.
Sa amo man nga programa, sanday Sangguniang Bayan member Eva Pacificador kag Liga ng Barangay President Niño Pacificador nagtao kang mensahe kag suporta sa amo nga lihuk. (AGP/PSM/PIA Antique)
