SYUDAD SANG ILOILO (PIA) — Ginrekomendar sang Iloilo City Health Office sa publiko ang paggamit sang face masks bangud sa pagtaas sang kaso sang COVID-19 sa syudad sang nakaligad nga pila ka semana.
Panugyan sang CHO sa publiko nga dapat magsuksok sang face masks ang mga indibidwal nga may mga comorbidities; mga immune-compromised; mga naga busong; mga indibidwal nga wala mabakunahan; kag mga indibidwal nga may sintomas.
“This rise in cases underscores the urgent need for our collective action to mitigate the spread of the virus and protect the health and well-being of our population,” pahayag ni Dr. Annabelle Tang nga hepe sang CHO.
Basi sa datos sang CHO, may ara 252 ka mga kaso sang COVID-19 sa syudad sang Agosto 6, 2024, kung sa diin 13 ang napatay kag 39 ang nagapabilin nga may aktibo nga kaso sa gihapon.
Ang two-week growth rate sang kaso sang COVID-19 sa syudad ang nagsaka sang 500 percent samtang ang average daily attack rate ang nagsaka man sa 0.74 sang Hulyo 24 tubtob Agosto 6, humalin sa 0.12 sang Hulyo 10 tubtob 23.
Bangud sini, yara sa moderate risk sang COVID-19 ang syudad, suno sa CHO.
Ginhatagan pagtamod man ni Tang ang importansya sang preventive measures sang publiko, pagsiguro sang mga nagakaigo kag husto nga impormasyon, kag ang paghatag sang suporta sa mga apektado sang virus.
Ginrekomendar man sang CHO ang pagpabaskog sang media campaign kag sakto nga pamaagi sa paghugas sang kamot kag pag-ubo.
Ang publiko, lakip ang mga empleyado nga may mga sintomas sang COVID-19, ang ginaabisuhan man nga magpabilin sa ila puluy-an kag magpangayo sang temprano nga konsultasyon agud malikawan ang paglapta sang virus. (AAL/JNH/PIA Iloilo)
