SYUDAD SANG ILOILO (PIA) — Nagpahanumdom ang Iloilo City Health Office (CHO) sa mga Ilonggo nga maglikaw sa katalagman sa pagsaulog sang paskwa.
Sa isa ka webinar, ginpaalintun ni CHO nurse Dariane Joy Papa ang ginapatigayon nga Iwas Paputok campaign bilang isa ka public safety measure nga magapahagan-hagan sang mga pilas, aksidente, kag kamatayon angot sa palupok
“This campaign promotes safer alternatives, such as community fireworks displays, to ensure a safe and joyous celebration,” sambit ni Papa.
Nalakip sa gindiskusyunan ang aspeto sang kampanya nga naga-pokus sa paghatag ihibalo sa publiko, pagsakdag para sa mas luwas nga mga alternatibo, pagpatuman sang mga pagsulundan, kag pagpasanyog sang kolaborasyon upod sa lokal nga mga komunidad.
Gintalakay man ang legal nga basihan sang kampanya santo sa Republic Act No. 7183 (1991) tuhoy sa paghimo, pagbaligya, kag pagamit sangpalupok; Executive Order 28 (2017), nga naga-limit sang firecrackers sa community displays kag pagdumili sang indibidwal nga pagamit sa mga lugar nga ginapuy-an; kag Iloilo City Ordinance 2017-266, nga naga-regulate sang pagbaligya kag pagamit sang palupok sa Iloilo City kag pagdumili sa pagamit sa mga sensitive nga mga lugar kaangay sang buluthuan kag ospital.
Dugang pa, ginapangabay ni Papa ang mga barangay nga mangin sa aktibo nga pag-ugyon sa pag-adbokasiya sa mga residente agud makaangkon sang nagakaigo nga mga lisensya sa paghimo kag pagbaligya sang mga palupok. (AAL/LMLE/PIA Iloilo)
