ILIGAN CITY (PIA) — Ang pagtaas sa ihap sa mga kaso sa human immunodeficiency virus (HIV) sa syudad dili timailhan nga nagkagrabe ang kahimtang, kondili resulta kini sa kusog nga kampanya sa kasayuran ug mas lapad nga pag-access sa testing ug treatment nga gi-offer karon sa City Health Office (CHO).
Gipasabot ni CHO Officer-in-Charge Dr. Glenn L. Manarpaac nga mas daghan na karon ang gustong magpa-test, nga nagpakita nga epektibo ang ilang adbokasiya. Ang pagtaas sa detected cases, matod niya, pasabot nga mas nasayod na ang publiko ug mas nisalig na sa libre ug kompidensyal nga serbisyo sa CHO.
“We can say na ‘yong number of cases natin na merong increase because of more testing, the people now are coming [forward]. Yung advocacy means effective. That is the reason why we can observe that more are going to our health facility to avail of our counseling and testing,” sumala niya.
Sumala sa CHO, ang sayong pagkahibalo sa status makatabang sa sayong pagtambal. Kung positibo ang resulta, dali silang ma-link sa libreng treatment. Ang serbisyo sa Social Hygiene Clinic ug uban pang health centers sa syudad libre ug highly confidential.
“If anyone feels the need to get tested, they can approach any of our staff at the Social Hygiene Clinic. They can go there. Rest assured this is very confidential. Hindi ma-divulge kung sino sila kasi kino-code natin ito,” matod ni Manarpaac.
Gihagit usab ni Manarpaac ang katawhan, labi na kadtong naapil sa high-risk groups, nga dili magduha-duha sa pagpa-test ug pagkuha og serbisyo. Abli ang Social Hygiene Clinic Lunes hangtod Biyernes alas 8 sa buntag hangtod alas 5 sa hapon. Pwede sab mag-request og special sessions kung kinahanglan.
Aron matubag ang mas taas nga panginahanglan, gi-reinforce sa CHO ang ilang health facilities. Ang Del Carmen Clinic karon gi-renovate ug gilauman nga maablihan karong tuiga isip accredited treatment center. Usa pa ka treatment hub ang gi-plano sa Gregorio T. Lluch Memorial Hospital o City Hospital.
Padayon usab ang kampanya sa CHO sa “ABC” approach batok HIV: Abstinence, Being faithful sa usa ka partner, ug Condom use. Libre ang mga condom, lubricant, testing, ug treatment sa mga health centers ug sa CHO.
Nagpahinumdom si Manarpaac nga ang pagkatesting nga positibo sa HIV dili kataposan, kundi sinugdanan sa bag-ong kinabuhi nga suportado sa komunidad nga puno sa pagmahal, wala’y diskriminasyon, ug walay stigma. (LELA/PIA-10/Lanao del Norte)
