CEBU CITY, Cebu (PIA) – Agi og pagsaulog sa National Coconut Week (NCW) matag Agosto, nagpahigayon ang Philippine Coconut Authority (PCA) Region 7 og tulo ka adlaw nga ‘Coconut Bazaar’ didto sa regional office aron ipadayag ang mga programa ug mga produktong na-ugmad nga may kalabutan sa coconut industry.
Matud pa ni PCA regional manager III Brendan Transmonte, ang pagpahigayon niini nga pagsaulog naghatag og higayon sa mga coconut farmers sa pagpasundayag sa nagkadaiyang mga produkto gikan sa lubi ug mapaambit kini sa publiko sa barato nga presyo.
Ang buwan sa Agosto, ti-uwan na ug PCA Cebu provincial manager Johndom Domagtoy mipasabot kini usa sa mga hinungdan nga ang National Coconut Week gitunong ang pagsaulog, kay sa dala nga tubig niini, moresulta sa daghang bunga sa mga lubi, nga hinungdan sa taas nga supply sa kopras, usa sa mga labing-dako nga produksyon gikan sa lubi.
Gisugdan ang nahisgutan’g pagsaulog og usa Techno Forum alang sa mga coconut farmers sa Cebu nga gipahigayon usab sa Agricultural Training Institute.
Gisundan usab kini og on-the-spot painting ug cooking contest.
Napulo ka mga partisipante ang misalmot sa on-the-spot painting gikan sa kalain-laing lugar sa Central Visayas ug aduna usab lima nga misalmot sa cooking contest.
Mipauli dala ang P5,500 isip first prize sa midaog sa on-the-spot painting, P3,500 sa second prize, P2,500 sa third prize, ug P1,000 alang sa consolation prizes.
Mipauli usab og P5,000 ang first prize sa cooking contest, P3,000 sa second prize, P2,000 sa third prize, ug P1,000 sa consolation prizes.
Misalmot usab ang mga coconut farmers sa rehiyon sa upat ka kategorya sa Coco Pa-Premyo aktibidad sa PCA.
Lakip niini ang CocoDami diin modaog ang aduna’y labing daghan nga lubi sa usa ka bulig, CocoKapal: ang labing baga nga unod sa lubi, CocoBigat: ang labingbug-at nga lubi, ug CocoLaki: ang labing-dako na bunga sa lubi.
Gitapos ang maong tulo ka-adlaw nga Coconut Bazaar sa usa ka consultation meeting kauban ang mga coconut farmers sa rehiyon aron i-presentar ang nagkalain-laing mga programa sa PCA.
Lakip sa mga programa nga gipadayag mao ang coconut planting, coconut fertilization, coconut intercropping, ug pest management nga gipundohan ubos sa General Appropriations Act.
Aduna usab program nga coconut planting ug replanting nga gipundohan sa PCA Corporate Income thru RA 8048.
Usa sa labing gipasundayag sa PCA mao ang mga benepisyo sa mga programa ubos sa Coconut Farmers and Industry Development Plan o CFIDP nga mapahimuslan, dili lamang sa mga coconut farmers apan usab sa ilang tagsa-tagsa ka mga pamilya.
Mahitungod niini, gipahingusgan usab sa PCA ang pag-rehistro sa mga coconut farmer sa National Coconut Farmers’ Registry System, nga mao’y unang kinahanglan aron makapahimulos sila sa mga programa ug aduna usab sila’y proteksyon ug pagsiguro sa suporta sa panahon sa kalamidad.
Ika-38 na ka tuig nga pagsaulog karong 2024, subay sa Agosto 19, 1987 nga si Presidente Corazon C. Aquino nag-deklarar sa matag katupasang semana sa Agosto isip ‘National Coconut Week’ (NCW).
Tumong sa maong proklamasyon ang pag-ila sa tampo sa coconut industry sa kinatibuk-ang ekonomiya sa nasud.
Niining tuig, gisaulog ang NCW sa tema nga ‘Paghubog sa Pilipinong Magniniyog: Daan sa Pag-angat ng ekonomiya at maunlad na Bagong Pilipinas.’ (JJT/PIA7)
