Pipila sa mga pagpangandam nga gilihok sa komisyon mao ang pagpatuman og massive ‘information dissemination campaign’ pagpasabot ngadto sa publiko sa mga kalihokan sa umaabot nga piniliay lakip napud ang pagsabwag sa mga impormasyon nga kinahanglang mahibaw-an og matiman-an sa mga botante og kandidato sa umaabot nga piniliay.
Sa gihahigayon nga ‘Kapihan sa PIA’ program niadtong Pebrero 5, gisaysay ni Lawyer Francisco G. Pobe, Comelec7 regional director, ang mga guidelines ug mga uwahing kalamboan sa ilang pagpapangandam dinhi sa Rehiyon 7 kalabot sa nag siabot nga piniliay karong buwan sa Mayo.
“The Commission on Elections is trying its best para ma protektahan ang proseso sa eleksyon through our massive information dissemination campaign para masabtan og mahibaw-an sa publiko nga kani diay gibuhat sa komisyon, dili ni ordinaryo nga buhat kung dili gi protektahan natu ang integridad sa proseso sa piniliay,” si Pobe miingon.
Matod usab sa hepe sa Comelec7 nga ang komisyon nakig alayon sa ilang mga partner agencies sama sa Department of Information and Communications Technology, National Telecommunications Commission, og National Bureau of Information ug uban pang mga ahensya sa gobyerno alang sa hugot nga pagdumala sa mga social media platforms ug pagbatok sa gitawag nga ‘fake news’ nga adunay dakong papel ug epekto sa dagan sa eleksyon.
Samtang, sa pagsiguro nga nga tanan mahatagan og higayon nga makabotar sa adlaw sa pinilay, gisiguro sa Comelec7 nga mga priority individuals sama sa mga ‘senior citizens’, ‘persons with disability’, ug mga ‘pregnant women’ mahimung prayoridad og mahimung pahimuslan ang early voting nga iipahamtang sa komisyon gikan sa alas singko hangtod sa alas siete sa buntag sa Mayo 12 adlaw sa eleksyon.
“Kung dili sila makavail sa early voting, tanang mga presinto, naa tay Emergency Accessible Polling Place, moagi sila aron ma priority nga maka botar. Sa mga remote areas, gipatuman usab sa Comelec nga tagaan og priority ang mga na belong sa vulnerable sector,” saysay ni Pobe.
Gipaambit usab sa opisyal nga karong buwan sa Marso o Abril sugdan na ang paghatag sa ‘Voter’s Information Sheet’ nga mahimong giya sa mga botante sa pagbotar.
Kini mao ang listahan sa tanang mga kandidato diha sa ilang syudad, munisipyo, o probinsya.
Si Pobe midugang nga ang komisyon magbutang usab unya ug mga Voters Assistance Desk nga mo-abag sa mga botante sa adlaw sa piniliay.
Kini pagadumalaan sa mga staff ug personnel sa Comelec7.
Giawhag ni Pobe ang publiko nga magpabiling mabinantayon ug aktibong mag-monitor sa mga kalihokan sa eleksyon aron masiguro ang transparency ug patas nga proseso niini.
Gipahinumdoman usab niya ang tanang mga kandidato nga mosunod sa mga lagda ug balaod sa eleksyon ug likayan ang bisan unsang matang sa electoral misconduct.
Matod sa Republic Act 9006 o ang ‘Fair Election Act’, gimanduan ang tanang mga kandidato ug political parties sa tukmang pagbutang sa ilang mga election propaganda materials didto sa mga designated common poster areas ug ginadili ang pagbutang niini ngadto sa public properties.
“Gihangyo namo ang publiko nga mag uban ta, kay kining kalihokan sa piniliay dili ni kalihokan sa usa ra kung dili ato ning kalihokan tanan. Mohangyo ta sa atong mga kaigsunon nga atong tan awon on a larger scale nga kaning atong gibuhat sa Commission on Election para ni sa umaabot nga henerasyon sa atong nasud,” pagpahinapos sa Comelec7 regional director. (RGC/PIA7 Cebu)
