Nagdara kang ACM roadshow sa San Jose District Jail ang COMELEC. (Litrato: BJMP)
SAN JOSE, Antique (PIA) — Gindara kang Commission on Elections (COMELEC) ang Automated Counting Machine (ACM) sa mga persons with disabilities ukon PWD kag persons deprived of liberty ukon PDL sa San Jose de Buenavista.
Suno kay Municipal Election Officer Atty. Johnna Q. Tronco-Catilo, dya nga lihuk nagatuyo sa pagpakita sa mga PWD kag PDL kang San Jose District Jail kun paano dya gamiton sa tion kang eleksyon.
Gindugang hambal ni Catilo nga dya pamaagi man agud maintindihan ka dya nga mga sektor nga importante ang anda hamili nga boto sa maabot nga eleksyon.
Gindayaw dya nga lihuk ni Municipal Disability Affairs Officer Amie Dava. Suno kana bahol dya nga bulig sa mga tawo nga may kasablagan sa lawas para makapartisipar sa maabot nga pinili-ay.
“Dya nagakahulugan lamang nga ang gobyerno nagtao ka igtalupangod sa mga may kasablagan sa lawas,” hambal ni Dava.
Kang ginhiwat ang ACM roadshow, nagpadara man ka “interpreter” para sa mga indi kabati ang Antique Integrated School sa pagpamuno ni Dr. Sylvia Obani.
Samtang, para sa mga priso kang San Jose District Jail, ginpakita man kananda ang ACM bisan pa nga sanda indi pisikal nga makaagto sa presinto para magboto.
Ang gindesignar lamang kang otoridad ang otorisado sa pagkolekta kang anda balota kag idar-on sa anda man natungdan nga presinto.
Suno kay Bureau of Jail Management and Penology Acting Jail Warden JINSP Marichu F. Servidad, nagpakita kang kasadya ang mga PDLs kang sanda nagtesting kun paano magboto.
Samtang, ang COMELEC nagpadumdum man sa tanan nga ang checkpoint sige gihapon nga ginapatuman para sa gun ban.
Ginhambal ni Catilo may kabilogan tanan nga 38,767 ang mga botante ka San Jose de Buenavista nga may 52 clustered precincts kag 20 ka voting centers. (AGP/PSM/PIA Antique)
