ROXAS CITY, Capiz (PIA) — Ginpahayag ni Atty. Salud Milagros Villanueva nga Provincial Election Supervisor sa Capiz sang Commission on Elections nga luyag sang COMELEC nga mapauswag ang bug-os nga eksperyensya sa pagboto sang mga Capiceño para sa Mayo 2025 nga eleksyon.
Ini ang gintagaan pagtalupangod sang opisyal sang COMELEC sa ginpatigayon nga media briefing bilang kabahin sang Provincial Joint Security Control Center nga ginlunsar sang nagligad nga Nobyembre 14 sa Capiz Police Provincial Office sa Camp Teodorico Apil sa sini nga syudad.
“First time nga e-implement on a nationwide scale ang temprano nga oras sang pagboto halin alas 5:00 sang aga tubtob alas 7:00 sang aga para sa mga tigulang, mga Persons With Disability, kag mga nagabusong nga mga babayi nga narehistro nga mga botante,” pahayag ni Villanueva.
Ginapreparar man sang Komisyon ang pagpatigayon sang mall voting para sa mga rehistrado nga botante sang Barangay 10 sa Roxas City sa Robinsons Place, Pueblo de Panay.
Ang COMELEC ang magapatigayon man sang dululungan nga demonstrasyon sang Automated Counting Machines (ACM) sa Nobyembre 25 sa mga syudad kag natumod nga kabanwahanan agud mapahibalo sa mga botante ang kapasidad kag paggamit sang makina.
Magapatigayon man sang roadshow nahanungod sa ACM sa mga komunidad kag nagkalain-lain nga grupo tubtub Enero subong nga tuig.
Base sa datos, ang probinsya ang may yara sang 542,355 ka rehistrado nga botante, 468 ka voting centers, 3,185 ka established precincts kag 773 clustered precincts sa 473 ka mga barangay.
Samtang ang paglunsyar sang PJSCC ang gintambongan nanday Col. Albert Tapulao nga provincial director sang Capiz Police Provincial Office, Col. Manolito Montel nga Deputy Brigade Commander sang 301st Infantry Brigade, Lt. Col. Vicel Jan Garsuta nga batallion commander sang 12th Infantry Batallion, CDR Edison Diaz sang Philippine Coast Guard – Capiz, Atty. Rommel Benliro nga Roxas City Election Supervisor sang Roxas City, kag madamo nga iban pa.
Ang PJSCC magaserbe nga sentro sa koordinasyon sang mga pagtinguha sa seguridad sa nagkalainlain nga mga ahensya sang gobyerno kag mga yunit sang pagpatuman sang kasuguan.
Nahibaluan nga ginlunsyar man ang Roxas City JSCC kasunod sang PJSCC kag ang sa lebel sang mga kabanwahanan ang nagsunod man sa paglunsyar sang ila natungdan nga mga JSCC agud mapabaskog ang seguridad sa eleksyon. (AGP/AAL/PIA Capiz)
