SYUDAD SANG ILOILO (PIA) — Sunod-sunod nga mga automated counting machine (ACM) roadshow ang ginpatigayon sang Commission on Elections (COMELEC) sa Western Visayas para sa palaabuton nga piniliay sa Mayo 12, 2025.
Kabahin sa ginapatigayonan sini ang mga katapo sang Police Regional Office (PRO) 6 kag sang Philippine Coast Guard (PCG) District Western Visayas sa ginhiwat nga ACM roadshow sa Camp Martin Teofilo Delgado sa syudad.
Sa isa ka interview, ginpahayag ni COMELEC 6 Regional Election Director Atty. Dennis L. Ausan nga kabahin ini sang voters’ education kag information dissemination nga adbokasiya sang Komisyon agod nga mapahibalo sa mga botante ang mga pagbag-o nga igapatuman para sa magaabot nga piniliay.
Dugang pa sini nga pinaagi sa roadshow, mapakita sang COMELEC indi lang ang mga bag-o nga feature sang ACM kundi amo man ang pagpahibalo sang pila pa nga mga inisyatibo nga igakilala sang Komisyon kaparehas sang adjusted nga oras sang early voting kag ang labing una nga mall voting sa rehiyon.
Sa ila bahin, ginkilala ni Police Brigadier General Jack Wanky, regional director sang PRO6, ang importansya sang ini nga aktibidad bilang ahensya sang gobyerno nga may katungdanan sa pagpasiguro sang katawhayan kag kalinongan sang palaabuton nga eleksyon.
Apang, nagpabutyag sang suporta ang CGDWV sa ginhiwat nga roadshow kon sa diin ila ginpahayag nga pinaagi sini, mahatag sang nagakaigo nga ihibalo ang ila mga katapo sa teknolohiya nga pagagamiton para sa piniliay.
Maglowas sa mga law enforcement agency, nagpatigayon man ang COMELEC sang ACM demo kag roadshow sa mga barangay, mga bulothoan, katapo sang media, kag pribado nga sector lakip ang Parish Pastoral Council for Responsible Voting (PPCRV) sa bug-os nga rehiyon.
Suno kay Ausan, nakatalana nga magtapos ang pagpatigayon samg mga roadshow sa Enero 30, 2025. (AAL/FRG/PIA6/lakipan sang mga report gikan sa PRO6 kag CGDWV)
