MISAMIS ORIENTAL (PIA) – Gitunol sa Department of the Interior and Local Government kon DILG ngadto sa Lugait local government unit (LGU) ang desktop computers, printers ug scanners aron gamiton niini isip Secretariat sa Peace Cluster, lakip usab ang Peace and Order Council, ug Anti-Drug Abuse Council (ADAC) niadtong Marso 3.
Isip representante sa DILG, gitunol ni Janetherlyn Labadan, Municipal Government Operations Officer ang maong mga ekipo ngadto sa lungsod. Gidawat kini ni Mayor Wellie Lim ug Vice Mayor Roger Lim.
Sumala ni Labadan, ang lungsod nahimong high-performing nga Municipal Peace and Order Council (MPOC) ug national awardee sa Anti-Drug Abuse Council (ADAC) National Performance Award niadtong Disyembre tuig 2024.
“Magamit kini aron ang mao nga dungog ug performance mapadayon or ma-sustain sa lungsod,” matud ni Labadan.
Ang Lugait usa pud ka drug-cleared municipality. Gidayeg sa DILG ang Lugait tungod sa ilang inisyatiba, programa, ug pasalig sa pagsugpo sa mga binuhatan nga naglambigit sa iligal nga druga sa mga komunidad.
Gikalipay ni Mayor Lim ang pagdawat sa maong mga ekipo.
“Dako kaayo ug tabang ang secretariat nga mogamit niini aron mas effective ug efficient ang ilang pag-backstop sa duha ka councils nga importante sa atong peace and order ug anti-illegal drugs campaign sa lungsod. Kini aron magpadayon ang pag-sustain sa initiatives nga peaceful ug orderly ug drug-cleared nga lungsod nato,” dugang pahayag sa mayor.
Ang Lugait nahimo nga national high-performing nga MPOC ug MADAC sa tibuok Pilipinas sa milabay nga mga tuig ug consistent kini nga giila sa mao nga kalampusan. (MCO Lugait/PIA Misamis Oriental)
