CEBU CITY, Cebu (PIA) — Mipadayag ang Civil Service Commission (CSC) sa hingpit nga suporta niini sa Republic Act No. 12080 o ang Basic Education Mental Health and Well-Being Promotion Act atol sa seremonyal nga pagpirma sa Implementing Rules and Regulations (IRR) pinaagi sa pag-institutionalize sa bag-ong mga posisyon sa plantilla nga gikinahanglan.
Tuyo sa maong balaod ang pagpangusog sa promosyon ug paghatag og serbisyo sa mental health alang sa basic education pinaagi sa pagpalambo sa school-based mental health nga mga programa ug ang pagtukod og School Divisions Mental Health and Well-being Offices ug Care Centers.
Lakip usab sa mga katuyoan niini ang paghimo og bag-ong plantilla nga mga posisyon nga tutokan sa CSC.
“The CSC fully supports the integration of mental health services into the education system by providing a structured career path for mental health professionals,” matod ni CSC Chairperson Marilyn Barua-Yap.
(Hingpit nga nagsuporta ang CSC sa paghiusa sa mga serbisyo sa mental health sa sistema sa edukasyon pinaagi sa paghatag og organisadong career path alang sa mental health professionals.)
Dugang niya nga ang bag-ong mga posisyon maggarantiya og kalig-on sa trabaho, saktong pagbansay o training, ug dugang suporta sa gobyerno alang sa mental health initiatives sa mga tunghaan.
Ang tulo nga mga gikinahanglan nga posisyon sa plantilla mao ang School Division Counselor, School Counselor, ug School Counselor Associates.
Ubos sa IRR, ang CSC gitahasan sa pagdumala sa estandardisasyon sa gikinahanglan nga kwalipikasyon, proseso sa pag-recruit, ug pag-aproba sa mga posisyon, aron masiguro nga ang mga kwalipikadong mental health professionals maapod-apod sa mga School Division Offices (SDOs) ug mga pampublikong tunghaan sa tibuok nasud.
Makigtambayayong ang CSC sa Department of Education (DepEd) ug sa Department of Budget and Management (DBM) aron mapadali ang pagrecruit ug pagpondo sa maong mga posisyon.
Tumong niini nga matag pampublikong tunghaan, sa dili madugay, aduna na’y access sa mga kwalipikadong mental health professionals aron suportahan ang kahimsog ug kaayuhan sa mga estudyante ug magtutudlo. (JJT/PIA7)
