TAGBILARAN CITY, Bohol (PIA) — Sa ikatulo nga semana sa Septembre, nga giila nga Civil Service Month sa 2024 (CSM 2024), nanawagan ang Civil Service Commission sa Bohol Field Office nga manguna ang mga empleyado sa serbisyo sibil sa pagpadayag sa Malasakit sa Kalikasan pinaagi sa aktibo nga pagsalmot sa International Coastal Clean-up karong Sabado, September 21.
Didto sa Kapihan sa PIA, gibutyag ni Zera Eliez Sanchez sa CSC Bohol nga ilang gi-aghat nga tanan ngamga ahensya sa kagamhanan lakip na ang mga Local Government Units ug subsidiaries niini sa pagpakighiusa sa Department of Environment and Natural Resources (DENR) aron maggahin og usa ka adlaw alang sa pagpanglimpyo sa kadagatan ug kabaybayonan.
Sa CSM sa buwan sa Septembre, gitagana sa CSC alang sa ilang ika 124 nga tuig, nga sundon ang senemana nga mga tema: Linggo ng Lingkod Bayani alang sa unang semana, Linggo ng Malasakit sa Kapwa, ug Linggo ng Malasakit sa Kalikasan sa ika tulo nga semana.
Bisan kon ang DENR maoy manguna sa kalihukan, nakig-abin ang CSC sa pagtampo sa mga empleyado sa nagkadaiyang ahensya aron ikapakita ang paglaban sa kalikopan, nga karon nagka-daut, dala sa abuso ug walay pagpakabana sa katawhan.
Sa matag tuig, ang International Coastal Cleanup Day, mag-agahat sa katawhan lukop sa kalibutan sa paghiusa aron maghimo og mga kalihukan batok sa paghugaw sa mga kadagatan ug katubigan, samtang magpanalipod sa bililhon nga buhilaman sa kadagatan.
Ug samtang kini nahimo nga tinuig nga kalihukan, gipahiluna sa mga tigpasiugda nga dili lamang manunit sa basura nga possible nga modagsa sa mga kadagatan, kon dili sa pagbahig usab niini aron ilhon kon unsa nga matang sa basura ang nagdaghan.
Importante nga makuha ang matang sa basura nga nagdaghan, kay kini mao usab ang gamiton sa kagamhanan aron manubag ang mga kompanya nga naghimo niiini sa ilang buhat sa pagpasayon sa pagsugod sa polusyon sa kadagatan, pasabut ni Sanchez.
Dinhi sa Pilipians, libo-an ka mga boluntaryo ang magsuhid sa mga kadagatan pinaagi sa pagpa scubasurero, sa mga kabaybayonan, mga suba, ug mga lanaw, aron pagpanguha sa mga basura nga makadaut sa kalikopan.
Gikan sa mga matang sa basura nga makuha, makahimo na ang kagamhanan sa pagpataw sa multa ngadto sa mga kompanya nga nagpadaghan sa basura, samtang ang mga local nga kagamhanan nagpanday na usab sa mga balaod sa pagdili sa pag gamit sa mga pustanan ug sudlanan sa liquid nga dili dali malata.
Si Gob Erico Aristotle Aumentado, nagpagawas na usab ug mandu ngadto sa mga empleyado sa Kapitolyo ug sa mga Lokal nga Kagamhanan sa aktibo nga pagsalmot sa kalihukan alang sa kalikopan. (RAHC/PIA Bohol)
