SYUDAD SANG ILOILO (PIA) – Sa obserbasyon sang National Rice Awareness Month (NRAM) subong nga Nobyembre, ang Department of Agriculture (DA) Western Visayas nagpatigayon sang “Pinasarap na Kanin Cooking Challenge” sang Nobyembre 5 sa Western Visayas Integrated Agricultural Research Center diri nga syudad.
Ini ang kabahin sang paghatag suporta sa mga nagapanguna nga mensahe sang NRAM subong nga tuig nga nagaganyat sa publiko nga magkaon sang kan-on kaupod ang iban nga mga “staple” kaangay sang adlay, mais, saging, taro, kamote, kag cassava.
Anom ka grupo humalin sa mga probinsya sang Aklan, Capiz, Guimaras, kag Iloilo ang nagpreparar sang ila tagsa ka rice-mix dishes.
Ang ila mga ginluto ginpili para sa padaog base sa damil kag nutritional value (40%), visual appeal (30%), originality kag creativity (20%), kag kabug-osan nga presentasyon (10%).
Ang Ginataang Bake Talong Rice Toppings with Filipino Style Paella nanday Susan Tespoer kag Brenda Hansson halin sa Sibunag kag San Lorenzo, Guimaras nagdaog sang una nga lugar kag sila nakabaton sang cash prize nga P10,000.00 kag 60-liter capacity electric oven.
Sanday Melrose Panganiban kag Jerry Yturiaga naman sang Malinao, Aklan ang nakakuha sang ikaduha nga lugar sa ila ginluto nga No Bake Rice and Lasagna with Samosa. Sila nakaagum man sang P7,000.00 nga cash prize kag three-liter capacity air fryer.
Samtang, si Barbara Venus kag Jacqueline Faderon halin sa Dumalag, Capiz ang nagdaog sa ikatlo nga lugar sa ila ginluto nga Rickma Arrez Concaldo with Veggie Balls and RMS Blend. Sila nakabaton sang P5,000.00 nga premyo kag isa ka multi-purpose nga rice cooker.
Ang mga wala nagdaog nga nagpasakop sa cooking challenge nakabaton man sang tig-P3,000.00 kaupod sang induction cookers.
Ang cooking challenge tinutuyo nga ipakita ang nagkalainlain nga mga recipe nga pwede mahimo sa kan-on.
Sa mahibal-an, ang apat ka mga nagapanguna nga mga mensahe sang NRAM amo ang mga masunod:
Adlay, mais, saba, atbp. ay ihalo sa kanin
Brown rice ay kainin
Kanin ay huwag sayangin
Dapat bigas ng Pilipinas ang bilhin
Sa idalom sang Proclamation No. 524, series of 2004, ang NRAM nga ginasaulog sa tagsa ka Nobyembre nagatuyo nga magpasanyog sang ihibalo sang publiko tuhoy sa rice-related issues.
Ginahatagan pat-od sang sini nga selebrasyon subong nga tuig ang #HalfCupFullHeartChallenge, nga naga-engganyo sa publiko nga magkaon sang half-cup sang kan-on para malikawan ang wastages. (AAL/AGP/ PIA 6 kalakip ang mga balita halin sa DA Western Visayas)
