SYUDAD SANG ILOILO (PIA) — Ginhanas sang Department of Agriculture (DA) Western Visayas ang ila agricultural information officers kaupod ang mga sangay sini kag mga probinsyal nga agricultural offices para mas epektibo nga mapahibalo ang mga programa kag adbokasiya sang ahensya.
Ang DA nagpatigayon sang Enhancing Social Media Presence of Government Agencies: Creating, Packaging, and Boosting Content for Facebook, YouTube, and Instagram workshop sa Anini-y, Antique sang damlag lang, kaupod si Public Relations and Communications Specialist Kenneth Lerona bilang resource person.
Iya ginhangkat ang mga partisipante nga mas palawakon ang panan-awan sa digital media nga indi lamang ini alternatibo sa tradisyonal nga pamaagi sa pagkomunikar. Ginsiling man ni Lerona nga mas maayo ang pag-obserbar sang “blended approach” kag mahimo gamiton ang artificial intelligence (AI) para mas pasangkaron ang content creation kag para mag-assess sang social media insights.
Iya gin-eksplikar nga ang ini nga pagbag-o nagapahanugot sa gobyerno nga mas epektibo nga mapalapnag ang impormasyon, magtukod sang pagsalig sang publiko, kag makig-angot sa ila paagi sa madamo nga mga plataporma.
“We don’t have to be boring,” siling ni Lerona, samtang iya ginhatagan talupangod nga ang mga digital tools nagasiguro nga ang mga mensahe sa agrikultura kag pagpangisda nagakabagay sa nagkalainlain nga mga grupo sang tumalan-aw.
Ginpakilala man ni Lerona sa mga partisipante ang AIDA ukon Awareness, Interest, Desire, and Action approach sa storytelling.
Bilang awtput, naghimo ang mga partisipante sang ila social media content plan kag sample materials nga nagahatag-tuon sa sektor sang agrikultura.
Suno kay DA Western Visayas Regional Information Officer James Earl Ogatis, ang mga pagtililipon kag seminar para sa mga agricultural information officers nagatinguha sa pagpabakod sang kapasidad sang gobyerno sa pagpaalinton sang mga pag-uswag sa sektor.
Ang mga partisipante ginbug-osan sang information officers sang DA, Bureau of Fisheries and Aquatic Resources, National Irrigation Administration-JRMP Stage II, Philippine Fisheries Development Authority, Philippine Crop Insurance Corporation, National Food Authority, kag provincial farmcasters sa Western Visayas. (AAL/AGP/PIA 6 kalakip ang mga balita halin sa DA-Western Visayas)
