SYUDAD SANG ILOILO (PIA) — Ginhanas sang Department of Agriculture Western Visayas (DA WV) sa duha ka adlaw tuhoy sa organizational diagnosis kag people management ang mga benepisyaryo sang Kadiwa Program.
Ang Kadiwa isa ka landmark nga programa nga ginapangunahan sang DA, nga nagalaum nga mapabaskog ang farm-to-market supply chain paagi sa direkta nga pag-angot sa mga lokal nga prodyuser sa mga konsumidor.
Suno sa hepe sang Agribusiness Promotion Section sang Agribusiness and Marketing Assistance Division sang DA WV nga si Rhea Cristina Resol, ang nasambit nga paghanas magapaayo sa mga kapasidad sa operasyonal kag pagpamuno sang mga benepisyaryo sang Kadiwa paagi sa paghatag sa ila sang mga importante nga mga instrumento para ma-improba ang ila organizational performance kag interpersonal skills.
Subongman, ang mga partisipante ginatan-aw nga maintindihan nila ang estuktura sang ila organisasyon, mahibal-an ang mga potensyal nga mga paghangkat, kag matun-an ang mga estratehiya nga praktikal para madumalahan sing husto ang ila tagsa ka Kadiwa outlets.
Amo man, iya ginpakigbahin ang best practices sa pagpatigayon sang internal assessments, pagpabakod sang team dynamics, kag pag-apply sang people-centered leadership sa kooperatiba kag community-based settings.
Paagi sa SWOT analysis, gintumod sang mga partisipante ang gaps kag nagdihon sang actionable plans samtang ginagamit ang mga instrumento sa komunikasyon para masolbar ang mga problema kag mapahulag ang mga miyembro nga dumalahan ang nagkalain-lain nga grupo sa ila komunidad.
Ang ginpatigayon nga workshop kabahin sang mas dako nga inisyatibo para mapasanyog ang palangabuhian sang mga yara sa laylayan kag para man ma-empower ang mga lokal nga prodyuser kag mga manugbaligya nga sila nakahibalo magdumala sing epektibo sa mga tawo kag sa sistema. (AAL/AGP/PIA 6 kalakip ang mga balita gikan sa DA Western Visayas)
