SYUDAD SANG ILOILO (PIA) — Ginkilala ang mga aktibo nga myembro sang Department of Agriculture (DA) Western Visayas press corps, provincial agricultural reporters, kag farmcasters sa ila dalagko nga kontribusyon sa pagpalab-ot sang mga programa kag serbisyo sang ahensya sa ginpatigayon nga Media Pasasalamat kag Year-End Press Conference sang Disyembre 17 sa syudad sang Iloilo.
Si DA Western Visayas Regional Executive Director Dennis Arpia nagpakigbahin sang mga programa kag inisyatiba para mapabakod ang seguridad sa pagkaon kag mapasangkad ang suporta sa mga mangunguma sa rehiyon.
“Sa maraming pagkakataon, ang inyong mga medium ang nagparating sa ating mga kababayan ng ating relevant efforts sa maraming challenges ng sektor,” siling ni Arpia, kon sa diin iya man ginpunto ang kinhanglanon sang ahensya para mas mapaayo ang kapasidad kag mga koneksyon para sa mas tayuyon nga pagbag-o sa agrikultura.
Iya man ginpatpat ang nagkalainlain nga mga paghangkat sa sektor kaangay sang climate change, ilabi na ang mga epekto sang El Niño kag La Niña sa produksyon sang pagkaon, pagbaligya sang palay, kag mga kahalitan nga dulot sang paglupok sang Mt. Kanlaon sa mga pananom kag kasapatan.
“Sa tulong ninyong lahat, mas malayo ang mararating ng pagpapatupad ng mga programa ng ahensya,” dugang pa ni Arpia.
Suno naman kay DA-WV Regional Information Officer James Earl Ogatis, ang DA nagapakig-angot sa mainstream media partners, subong man sa mga farmcasters sa probinsyal nga lebel para mapalab-ot ang mensahe sa mga stakeholders sa urban kag rural nga sektor sang pagpanguma.
Iya ginhatagan man importansya ang ila kontribusyon nga angay gid para sa mga mangunguma nga makabaton sang nagakaigo sa tio-on, naangot, kag makabulig guid nga mga impormasyon para mapadamo ang ila produksyon kag kita.
Ginhatagan sang DA sang plaques, mga sertipiko, tokens, milled rice, kag cash prizes ang outstanding nga agricultural reporters para sa print, radyo, telebisyon, digital media, photojournalism, provincial media partners, kag provincial agricultural information officers/farmcasters sa ginhiwat nga pagtililipon. (AAL/AGP/PIA 6 kalakip ang mga balita gikan sa DA-WV)
