SYUDAD SANG ILOILO (PIA) — Ginkilala sang Department of Agriculture Western Visayas (DA-WV) ang mga talalupangdon nga mga kababainhan sa kaumahan sa rehiyon paagi sa 2024 Gawad Parangal sa Katangi-tanging Kababaihan sa Pagsasaka at Pangingisda sa Kanayunan sang Oktubre 17 diri sa Iloilo City.
Apat ka mga babaye nga lider nga may dako nga kontribusyon sa agricultural development, community leadership, kag gender equality ang ginpasidunggan sa nasambit nga awarding ceremony para sa Search for Outstanding Rural Women (SORW).
Ang mga nagdaog sa SORW ginhibalo paagi sa mga talaksan kalakip na ang ila kontribusyon sa food security/ agricultural and fishery development; kontribusyon sa sustainable development kag paggamit sang climate-resilient ukon environment/ women-friendly nga mga teknolohiya; kag ila impact sa pagsulong sang women empowerment, gender equality, leadership, kag kontribusyon sa sosyodad kag lokal nga ekonomiya.
Subong nga 2024, ginhatagan sang DA-WV sang special citation si Beatrice Lastimoso sang San Carlos, Negros Occidental; Nieva D. Dela Torre sang Maayon Capiz bilang 2nd runner up; Fatima Ebanen sang Igbaras, Iloilo bilang 1st runner up; kag Ma. Ninfa Desiree Segovia sang Malay, Aklan nga ginkilala bilang Regional Winner.
Suno kay DA Regional Technical Director for Research and Regulations Zarlina B. Cuello nga samtang ginahatagan talupangod ang dako nga papel sang mga kababainhan sa kaumahan, ginaselebrar man sang DA ang ila mga hinimuan kag kontribusyon sa patag sang agrikultura kag pangisdaan sa Kabisayaan Nakatungdan.
“As we highlight the significant contributions of the regional winners, we continue calling for action and concerted effort to rebuild food systems from the ground focusing on empowering rural women to produce and distribute diverse, healthy food, and create innovation to rural enterprise,” siling ni Cuello.
Ginhambal man ni Cuello nga ang ini nga inisyatibo nagakaangot sa global efforts nga nagasuporta sa mga babaye sa kaumahan sa ila palangabuhian kag leadership para malab-ot ang Zero Hunger sa idalom sang Sustainable Development Goal (SDG) No. 2 kag Gender Equality nga yara sa SDG No. 5 nga pangako sang pungsod bilang myembro sang United Nations.
Sa pihak nga bahin, si 2024 regional winner Ma. Ninfa Desiree Segovia naghatag man sang iya mensahe nga nagapanawagan sa mga kababainhan nga magsalig sa kamaayuhan nga dulot sang agrikultura.
“I’d like to inspire our women farmers to continue farming because women have important roles in the countryside especially in agriculture. We provide food for our community. Let us put our efforts into farming, believe in agriculture, and move towards agribusiness,” suno kay Segovia. (AAL/AGP/PIA 6)
