Laragway: DA Western Visayas
SYUDAD SANG ILOILO (PIA) — May kabug-osan nga 82 ka farmer cooperators ang nagpartisipar sa technical briefing kag capacity building para sa mga tagsakdag kag farmer cooperators tuhoy sa Adaptive Balanced Fertilization Strategy (ABFS) para sa produkto nga mais.
Ang Department of Agriculture (DA) sa Western Visayas paagi sa Bureau of Soils and Water Management (BSWM), nga amo ang nagapanguna nga ahensya sa pag-implementar sang National Soil Health Program (NSHP), nag-organisa sang aktibidad nga nagalantaw pasangkaron ang ihibalo sa ABFS technology kag paano ini mas makapaayo sang produktibidad sang tanum, soil fertility kag health, kag nagasakdag sang maayo nga paggamit sang abono sa bahin sang mga mangunguma sang mais.
Si Karen S. Bautista, hepe sang BSWM Soil and Water Resources Research Division kag Soil and Water Area coordinator para sa Rehiyon VI, ginpunto nga ang ABFS Corn Project nasandig sa integrated nutrient management. Ang primero sini nga tinutuyo amo ang maimproba ang soil health, mapataas ang kita sang kaumahan paagi sa pagpanubo sang production costs, kag pagpasangkad sang crop yield.
Iya man ginpakigbahin ang mga importante nga papel sang talatapan sa idalom sang NHSP–Accelerating Balanced Fertilization Strategy nga inisyatibo. Ang ini nga mga responsibilidad ginalakipan sang pagpatigayon sang technical briefings kag orientations para masiguro ang pagsunod sa ABFS protocol, amo man sa pagpanagtag sang seeds kag abono nga santo sa mga rekomendasyon sang ABFS.
Ang BSWM may papel man sa pagpatigayon sang agro-socio-economic surveys para matukod ang baseline data, regular monitoring kag data collection sa techno-demo sites, kag pagkonsolidar sang resulta sang demonstrasyon para maghatag sang policy inputs sa DA.
Subong man, ang ahensya responsable man sa pagpreparar sang reports kag iban pa nga importante nga dokumentasyon para isumite sa DA kag iban pa nga mga tagsakdag.
Ang paghanas naglakip man sang diskusyon sa pest and disease management sa pagprodukto sang mais nga ginpangunahan ni Cherry Tayson, hepe sang DA Western Visayas Regional Crop Protection Center.
Samtang, si Renan Palomo, coordinator sang DA Western Visayas’ Corn Program, nagpasalamat sa mga nagtambong nga farmer cooperators. Iya gin-agda sila nga buksan ang panghuna-huna kag maghakos sa bag-o nga mga teknolohiya kaangay sang ABFS para sa mas maayo nga produksyon kag ani sang mais.
“Let us embrace and try the technology showcased, especially the improved fertilizer application methods,” siling ni Palomo, samtang ginpasalig ang mga mangunguma sang ila padayon nga suporta sa implementasyon sang proyekto. (AAL/AGP/PIA 6 kalakip ang mga balita gikan sa DA Western Visayas)
