SYUDAD SANG ILOILO (PIA) — Ginapahibalo sang administrasyon ni Presidente Ferdinand R. Marcos ang plano para sa pilot rollout sang P20 per-kilo rice initiative nga magasugod sa rehiyon sang Visayas.
Ini kasunod sang closed-door meeting sang Presidente kag ang 12 ka mga gobernador nagikan sa rehiyon sang Visayas sa Cebu Provincial Capitol sang Abril 23.
Suno kay Department of Agriculture (DA) Secretary Francisco Tiu Laurel Jr., ang nasambit nga mga rehiyon magaserbe bilang mga testbed para sa implementation strategies kag logistical coordination.
Gindugang sini nga ang programa tuyo nga pasangkaron sa bug-os nga pungsod, agud mangin accessible ang affordable nga bugas sa madamo nga mga pamilya nga Filipino sa pungsod.
“We launched it here (Cebu) because mas marami ngang nangangailangan sa mga regions na ‘yun. But, of course, ang eventual intention nitong programang ito — once we sort out all the issues logistically and para makita talaga how to operate it and launch it and manage it — nationwide ito eventually,” pahayag sini.
Bilang kabahin sang initial phase, magahatag ang DA sang tubtub 40 kilos sang bugas sa tagsa ka panimalay sa tagsa ka bulan. Ang programa natalana nga magalawig tubtub Disyembre, nga may posibilidad sang extension tubtub Pebrero 2026 ukon tubtub 2028, siling ni Laurel.
“Our President has given the directive to the Department of Agriculture to formulate this to be sustainable and tuloy-tuloy hanggang 2028,” pahayag sang Tiglikum sang DA.
Ginpahayag ni Laurel nga ang pagbakal sang barato nga bugas sa publiko magadecongest sa bodega sang National Food Authority (NFA) nga sa karon naga-operar sa bug-os nga kapasidad tuga sang dako nga volume sang milled kag unmilled rice stocks.
Ginhinambit sini nga ang stockpile sang pungsod nagdugang gikan sa 300,000 metriko tonelada tubtub 358,000 metriko tonelada tuga man sang panahon sang tig-alani.
“So, we really have to move out and dispose of. That’s also the other factor,” siling ni Laurel. (AAL/LAF/PIA6-Iloilo/PND)
