TAGBILARAN CITY, Bohol (PIA) — Aron mapugngan ug makontrolar ang presensya sa mga peste sa mga lugar sa mais sa Bohol, ang Department of Agriculture Central Visayas (DA7), sa pakigtambayayong sa Office of the Provincial Agriculturist (OPA-Bohol), bag-o lang nagpahigayon og komprehensibong monitoring sa 50- ektarya nga Corn Model Farm sa Barangay Cantubod, lungsod sa Danao, Bohol.
Ang corn model farm usa ka technology demonstration project sa corn program sa DA nga nagtumong sa pagpakita sa pinakamaayong gawi ug epektibong pagdumala sa corn farming aron mapalambo ang agricultural productivity ug masiguro ang food security alang sa komunidad.
Atol sa monitoring, namatikdan sa team gikan sa Provincial Agricultural Technology Coordinating Office (DA7 PATCO-Bohol) sa DA7 ug sa OPA ang presensya sa fall army worms (FAW) sa mga techno-demo corn areas.
Ang FAW (Spodoptera frugiperda) usa ka bangis nga peste nga makadaot sa mga tanum nga mais ug uban pang mga tanum.
Girekomenda ang mga hinanaling aksyon aron malikayan ang dugang nga kadaot ug masiguro ang kahimsog sa mga tanum nga mais.
Si Jomer Ayenza, ang presidente sa Cantubod Farmers and Development Association (CFDA) niingon nga nabalaka siya sa iyang mga talamnan sa mais nga nataptan sa sakit, apan naglaum gihapon siya nga maulian kini, uban ang husto ug dinalian nga mga interbensyon nga gihatag.
Ang team, sa pagmonitor nag-apply sa mga interbensyon sa pagdumala ug pagkontrol sa populasyon sa FAW.
Kining hiniusa nga pamaagi sa pagdumala sa peste makapamenos sa infestation ug manalipod sa abot sa ani, pagsiguro sa pagpadayon sa umahan ug sa panginabuhian sa mga mag-uuma nga nalambigit.
Ang FAW Task Force sa Office of Provincial Agriculturist leader Joseph Roy Dando, nihatag og gibug-aton sa kamahinungdanon sa mga proactive nga lakang ug padayon nga pagmonitor.
“Through sa reported incidence sa maong dangan nakig coordinate kita sa Department of Agriculture para makapangayo kita og assistance, especially sa mga kemikal nga mapang-apod nato sa kadaot,” matud pa ni Dando.
Ang DA nag-awhag sa mga mag-uuma ug stakeholders nga magpabiling mabinantayon ug i-report dayon ang bisan unsang timailhan sa pagdagsang sa peste. (ECB/PIA7-Bohol)
