SYUDAD SANG ILOILO (PIA) – Ginpasidunggan ni Undersecretary Asis Perez sang Department of Agriculture ang dako nga kontribusyon sang mga mangunguma kag mangingisda sa seguridad sang pagkaon kag ekonomiya.
Iya ginhatagan talupangod ang kritikal nga papel sang probinsya sang Iloilo bilang ika-apat sa pinakadako nga producer sang palay sa pungsod, kag amo man nga may dako nga kontribusyon sa produksyon sang isda, mais, tubo, prutas, kag kasapatan.
“Your dedication sustains not just the livelihoods of millions, but also the future of our agricultural and fisheries industries,” siling ni Perez.
Naghatag man siya pasiguro sa iya ginhatag nga mensahe nga ang Bureau of Fisheries and Aquatic Resources (BFAR) 6 nagapadayon nga tampad sa pagpalig-on sang mga tikang para mas mapataas ang produksyon kag himuon nga mas accessible kag barato ang pagkaon para sa tanan nga Pilipino.
Ginsambit man ni Perez ang ideya nga ang agrikultura amo ang “lifeblood” sang Iloilo kag iya man ginkonsidera ang mga mangunguma kag mangingisda bilang mga bayani sang nasyon.
Ang Pambansang Mannalon-Maguuma-Magbabaul-Magsasaka ng Pilipinas (P4MP) naghiwat man sang induction sang ila opisyales bilang parte sang Iloilo Farmers’ and Fisherfolk’s Culmination sa Passi City.
Nagtambong man sa aktibidad sanday DA Regional Executive Director Dennis Arpia kag BFAR Regional Director Remia Aparri, kaupod ang mga lokal nga opisyal, kag mga lider nga mangunguma kag mangingisda. (AAL/AGP/PIA 6 kalakip ang report gikan sa BFAR 6)
