SYUDAD SANG ILOILO (PIA) — Ginbalikan sang Department of Agriculture-Western Visayas (DA-WV) ang mga binuhatan sini sa idalom sang MASAGANA Rice Program paagi sa ginpatigayon nga assessment para sa wet cropping season.
Nagtililipon sa aktibidad ang mga lokal nga pangulohan, agricultural experts, kag extension workers gikan sa anum ka rice-producing provinces sa rehiyon para mag-ebalwar sang implementasyon kag epekto sang programa sa mga mangunguma.
Ang programa nagalaum nga pasangkaron ang produktibidad sang palay sa Western Visayas paagi sa pagpangahatag sang binhi nga may mataas nga kalidad, abono, kag technical assistance. Sang wet season, ini nagserbe sang importante nga papel sa pagsuporta sang mga mangunguma nga nakaatubang sang mga paghangkat dulot sang nagabag-o nga weather patterns.
Apisar nga nagpangatubang sang mga paghangkat tungod sa madamol nga pag-ulan kag mga bagyo sa iban nga lugar, ang programa nagpakita sang maayo nga resulta. Base sa assessment, madamo nga mga mangunguma nga nag-improba ang crop performance bangud sa insakto nga pag-deliver sang inputs kag husto nga koordinasyon sang rice cluster coordinators kag mga lokal nga pangulohan. Apang, may mga isyu man kaangay sang pagbaha sa catch basin areas kag indi pagpananom sa insakto nga oras bangud sa weather disruptions, mga bagay nga kinahanglan pabaskugon ang mga estratehiya suno sa mga partisipante.
Ginhatagan naman pagtamod sang agricultural extension workers (AEWs) halin sa mga LGUs ang importansya sang pagtuon gikan sa mga eksperyensya para mas pabakuron ang mga buhaton sa mga masunod nga ti-on.
Sa pag-abot sang dry season, ginplano na ang mga pag-adjust para masiguro ang mas epektibo nga implementasyon sa pagprodukto sang palay. Ini nagalakip sang pagpauswag sang monitoring systems, input distribution processes, kag paghatag sang dugang nga suporta-teknikal sa mga vulnerable areas.
Ginpahayag naman sang DA-WV ang padayon sini nga pangako nga i-empower ang mga mangunguma kag siguraduhon ang seguridad sa pagkaon sa rehiyon.
Subongman, paagi sa pagpasangkad sang kolaborasyon sa mga lokal nga pangulohan, extension workers, kag mga mangunguma, tinutuyo sang MASAGANA Rice Program nga magtukod sang mas mabakod kag produktibo nga sektor sang agrikultura. (AAL/AGP/ PIA 6 kalakip ang mga balita halin sa DA Western Visayas)
