SYUDAD SANG ILOILO (PIA) — Gindala sang Department of Agriculture (DA) Western Visayas ang ila KADIWA nga programa sa West Visayas State University (WVSU) Week sang Enero 27 tubtob 31.
Ang selebrasyon may tema nga, “Discovery and Innovation for Growth and Meaningful Opportunities (DIGAMO) sa West.”
Ginbida sa aktibidad ang nanari-sari nga agrikultural nga mga produkto paagi sa agro-industrial exhibit nga ginpakita ang mga lab-as kag mangin mga ginproseso nga produkto gikan sa nagkalainlain nga mga munisipalidad sa Western Visayas.
Ang “KADIWA sa WVSU” opisyal nga ginbuksan nanday WVSU President Dr. Joselito Villaruz kag DA-WV OIC-Regional Technical Director for Operations and Extension Maria Teresa Solis.
Nagpasakop sa KADIWA ang mga agrikultural nga kooperatiba kag negosyante nga ginbug-osan sang Tubungan Vegetable Producers Association, Alimodian Agricultural Cooperative, Emilyu Food Products, Young Farmers Challenge Awardees, Armi’s Ice Cream, Produkto de Iloilo, Hugpong Iloilo Backyard Farming Cooperative, Leon Bagsakan Vendors Association, AAJ Dried Fish, kag Smart Greenhouse Project sang DA.
Nagbaligya man ang National Irrigation Administration 6 sang barato nga Bagong Bayaning Magsasaka (BBM) Rice sa presyo nga P29.00 kada kilo ukon P290.00 para sa 10-kilogram bag. Ang BBM Rice amo isa ka component sang Farming Support Services Program sang ahensya. Ini nagahatag sang barato nga bugas sa mga konsumidor samtang ginasuportahan ang mga lokal nga mangunguma.
Ang mga bisita, kaupod ang mga estudyante kag iban pa mga tagsakdag, nakakuha man sang educational materials nga ginpanagtag sang Regional Agriculture and Fisheries Information Section (RAFIS) sang DA. (AAL/AGP/ PIA 6 kalakip ang mga balita gikan sa DA)
