SIQUIJOR, Siquijor (PIA) — Pagahimoon ang Dagyaw Town Hall Meeting sa temang, “Hayag nga Kaugmaon ug Kalambuan sa Tanan: Kulokabildo sa Kuryente ug Internet”sa Probinsya sa Siquijor, karong Hunyo 27, sa Dugokanan sa Kapitolyo, Provincial Capitol, Siquijor, Siquijor.
Gikuha sa Hiligaynon nga pulong nga “bayanihan,” ang Dagyaw usa ka “open space” nga plataporma nga magsilbing tulay tali sa gobyerno ug ordinaryong mga Pilipino aron makalatag ang kahigayonan sa paghisgot sa nagkalain-laing proyekto, programa o isyu ug aron usab mapalambo ang pagsalig sa gobyerno pinaagi sa pagpakighisgut hisgut ug kukabildo.
Kini gipasabot ni Siquijor Department of the Interior and Local Government (DILG) Provincial Director Dennis Quiñones atol sa Kukabildo kon Kapihan sa PIA nga gihimo, June 24, sa Philippine Information Agency (PIA) sa Siquijor.
Matud pa niya, gilusad ang dagyaw aron paghatag og higayon sa mga lumupyo sa pagpadayag ug pangayo ug katin-awan sa mga nag-unang isyu sa lalawigan nga angayan matuki ug hatagan og aksyon sa mga hingtungdang ahensiya.
Kabahin sa kuryente ug internet connection sa lalawigan pagahisgutan sa labing bag-ong Dagyaw.
Gihimo usab atol sa maong kalihukan ang Ceremonial Turnover of Public Wifi sa unom ka Local Government Units.
Mopahigayon usab ang Kagamhanang Lokal sa Siquijor og Caravan ug Kadiwa sa Pangulo kauban sa nagkalain-laing national government agencies , isip usab pagtabang sa mga mag-uuma, mananagat ug micro small and medium entrepreneurs sa paghalin, ug pagpromote sa ilang mga produkto.
Gibana-banang mokabat sa 500 ka mga Siquijodnon ang mosalmot sa maong kalihukan gikan sa nagkalain-aling sector sa katilingban.
Ang Dagyaw gipasayon pinaagi sa gihimong Technical Working Group (TWG) nga gilangkuban sa DILG, Department of Budget and Management (DBM), PIA ug civil society organizations.
Ang Dagyaw makita sa livestream sa mga Facebook pages sa PIA-Siquijor, DILG-7 ug DBM. (RAC/PIA7 Siquijor)
