DAPITAN — Gisaulog na usab sa tibuok nasud ang Women’s Month ug karong tuig 2023 ang selebrasyon nagtimaan sa usa ka yugto sa pag-uswag sa mga katungod sa kababayen-an nga naglusad sa usa ka bag-ong tema hangtod sa 2028 nga “WE for gender equality and inclusive society.”
Subay niini, ang kagamhanang lokal sa syudad sa Dapitan sa pagpangulo ni Mayor Seth Frederick “Bullet” P. Jalosjos pinaagi sa buhatan sa City Social Welfare and Development sa pagpanguna ni Marilyn Saldon-Sy nangandam sa dakong selebrasyon alang sa mga kababayen-an.
Matud pa ni Mayor Jalosjos nga ang mga kababayen-an maoy ehemplo sa kaisug, paglaum, ug kinabuhi mao nga anaa ang suporta sa kagamhanang lokal pinaagi sa mga programa nga makahatag kanila ug kalipay, panginabuhian ug uban pa aron mapabati ngadto kanila ang importansya nila dinhi sa katilingban.
Gipadangat ni Cristylou Mae Gucor ang focal person sa women’s association nga adunay duha ka adlaw ang selebrasyon alang sa mga kababayen-an nga ipahigayon karon umalabot Marso 21 ug 29 nga gilangkuban sa mga nagkadaiyang programa.
Sa Marso 21, magpahigayon ug Women’s Forum nga pagasalmutan sa 50 ka mga presidente sa matag-barangay ug 30 ka mga kawani gikan dinhi sa kagamhanang lokal. Aduna usab “Tabuan sa Dapitan” nga ang matag-barangay magbaligya sa mga iladong produkto nga dinhi e-display sa Lobby, Government Center.
Samtang sa Marso 29, adunay Women’s Month Culmination pagasugdan sa float parade nga maggikan dinhi sa Government Center paingon na sa Dapitan City Cultural and Sports Center. Magpasundayag usab sa talento ang lima ka yunit sa modern ug traditional nga sayaw pinaagi sa kompetisyon ug adunay himoong “Ginang Dapitan City”. (Marecris Am-is | Dapitan City Information Division)
