SYUDAD SANG ILOILO (PIA) — Nagpanagtag ang Department of Agrarian Reform (DAR) Iloilo sang balor P2,420,000.00 sang mga makinarya kag galamiton sa pagpanguma sa pito ka mga organisasyon sang mga benepisyaryo sang agraryong pangreporma sa probinsya sang Iloilo.
Ining mga makinarya kag galamiton ang kabahin sang Sustainable Livelihood Support (SLS) program kag Major Crop Block Farm project nga gina-implementar sang Program Beneficiaries Development Division sang ahensya sini nga tuig 2025 nga nagatuyo nga mapataas ang produksyon sa panguma sang mga benepisyaryo pinaagi sa mekanisasyon.
Sa idalum sang SLS, anom ka mga organisasyon ang nakabenepisyo nga ginalakipan sang Panuran Agrarian Reform Cooperative (ARC) sa banwa sang Lambunao, Ipil ARC sa Calinog, Balanac ARC sa Janiuay, Pandan Multi-Purpose Cooperative sa Dingle, Mulapula Agrarian Reform Cooperative sa syudad sang Passi kag CAPISAN ARC sa San Dionisio. Ini nga mga organisasyon ang nakabaton sang hand tractor nga may nanuhaytuhay nga aksesorya kag turtle power tiller para sa CAPISAN ARC.
Sa bahin naman sang Major Crop Block Farm project, kapin sa P1,360,000.00 nga balor sang 4WD tractor with 40 HP ang ginbaton sang KASAPPI (Katilingban sang mga Mangunguma Padulong sa Pag-uswag sang Iloilo) sa syudad sang Passi.
Ginpasalamatan naman ni Richard Malongayon, tsirman sang Balanac ARC, ang nabaton nga makinarya sang ila organisasyon – hand tractor with trailer and accessories. Suno kay Malongayon paagi sa sining bag-o nga makinarya kag mga teknolohiya nagikan sa DAR mapa-uswag nila ang ila produksyon sa panguma.
“Ang mga makinarya nga gintao tulad sang DAR sa Balanac ARC tama gid dya kahanggod ang mabulig na sa mga magagmay nga ARBs kag makatimbang gid dya sa aktibidades sa pagpanguma kag kabay sa dugang pa gid nga mga teknolohiya nga mapataas ang produksyon sa pagpanguma,” siling ni Malongayon.
Suno sa report sang DAR – Iloilo nagsugod ang distribusyon sang mga makinarya kag galamiton sang katapusan nga semana sang Pebrero tubtub sa una nga semana sang Marso. (AAL/LAF/PIA Iloilo)
