DIPOLOG CITY, Mar 31 (PIA) – Ang Department of Agrarian Reform (DAR)- Zamboanga Del Norte, nipahigayon ug turn-over sa Farm Machinery and Equipment (FME) ngadto sa Agrarian Reform Beneficiaries of Marcelo Cooperative (ARBEMCO), nga gilangkuban sa usa ka bag-ong Hauling Truck ubos sa Sustainable and Resilient Agrarian Reform Communities (SuRe-ARC) Project, atol sa ARBEMCO 25th General Assembly sa Marcelo, Kalawit, Zamboanga Del Norte.
Ang probisyon sa maong FME gituyo nga gamiton ug una sa pagdala sa mga produkto sa agrikultura sa mga Agrarian Reform Beneficiaries Organizations (ARBOs) sa ilang produksyon sa goma ug uban pang negosyo aron mapalambo ang ekonomikanhong potensyal ug kita sa kooperatiba.
Sa wala pa ang opisyal nga turnover ceremony, ang mga partido mipirma sa Memorandum of Agreement tali sa DAR ug sa Agrarian Reform Beneficiaries of Marcelo Cooperative (ARBEMCO) isip kasabutan sa mga termino ug kondisyon.
Bisan pa sa mga hagit nga nasugatan sa kooperatiba, si Provincial Agrarian Reform Program Officer II (PARPO II) Rizzel Villanueva nanghinaot nga ang nasangpit nga mga ekipo mahimong dako nga suporta sa pagpataas sa kita niini. Sa iyang mensahe, gitambagan sa PARPO II ang mga benepisyaryo sa kooperatiba nga magmapainubsanon, masinabtanon ug matinabangun alang sa kalampusan sa komunidad.
Mitambong usab sa maong asembliya sila si MARPO Loida Gimena, ARPO I Engr. Ryan Monleon (SuRe Point Person), LBP Loan Officer Perry Boy Baltazar, CDA Regional Director Glenn S. Garcia, LGU ug uban pang ahensya. (RVC/MML-OJT/PIA9-Zamboanga del Norte/with reports from DAR Zamboanga del Norte)
